Liberalizimi i vizave, GAP: 28% e popullsisë planifikojnë të emigrojnë gjatë periudhës së parë të këtij viti

Në prezantimin e Raportit të Institutit GAP “Prirja për të emigruar nga Kosova pas liberalizimit të vizave: Ndikimi në fuqinë punëtore”, ka rezultuar se nga 1 mijë qytetarë të anketuar, 28 për qind e tyre planifikojnë të emigrojnë në Zonën Schengen, kjo pas liberalizimit të vizave nga Bashkimi Evropian.

Në këtë raport bëhet me dije se nga vitit 2012 deri në vitin 2022, nga Kosova kanë migruar 338 mijë qytetarë, apo thënë ndryshe 18.8 për qind e popullsisë së Kosovës.

Gjithmonë sipas këtij raporti të publikuar këtë të shtune, arsyet kryesore që i përmendin qytetarët që planifikojnë migrimin janë kushtet ekonomike, ndërsa sektorët që do të preken më shumë janë ndërtimtaria, hoteleria dhe gastronomia.

Blendi Hadaj, hulumtues i lartë në GAP, dhe njëri nga publikuesit e këtij raporti, ka thënë se instituti në fjalë ka bërë këtë hulumtim, ku ka anketuar mbi 1 mijë persona, dhe sipas kësaj gjetje pritet që 28 për qind e popullsisë të emigrojë gjatë periudhës së parë të këtij viti.

Në prezantimin e raportit, Hadaj theksoi se disa nga gjetjet kryesore tregojnë se liberalizimi i vizave e gjen Kosovën në një dinamikë ndryshe se shtetet tjera të rajonit në kohën kur atyre iu ofrua lëvizja e lirë në BE.

“Në vitin e parë pas liberalizimit të vizave për shtetet tjera të Ballkanit Perëndimor, shkalla e emigrimit nuk ishte shumë e lartë, duke arritur në maksimum 2.9% të popullsisë së një shteti, por tendenca për të emigruar është bërë shumë më e theksuar në tërë Ballkanin Perëndimor pas vitit 2015. Kjo kryesisht si rrjedhojë e kërkesave të mëdha dhe zbutjes së kritereve nga shtetet e BE-së për punëtorë të huaj”, tha Hasaj.

“Nga viti 2012 deri në vitin 2022, nga Kosova kanë emigruar mbi 338 mijë qytetarë. Vetëm në vitin 2022 kanë emigruar 41,553 qytetarë dhe në këtë vit fuqia punëtore aktive është zvogëluar për 21,571 persona, ndërsa fuqia punëtore jo-aktive është zvogëluar për 14,698 persona”, shtoi.

Hulumtuesi i lartë në Institutin GAP potencoi se në rast se nuk kemi një aktivizim të fuqisë punëtore jo-aktive, “e cila është mjaft e lartë, aktualisht zëvendësimi i fuqisë punëtore së munguar nga imigrantë të huaj është i pamjaftueshëm”.

“Në vitin 2022, 2 mijë e 979 shtetas të huaj të cilët kanë emigruar në Kosovë për arsye punësimi kanë zëvendësuar më pak se 14 për qind të fuqisë punëtore aktive që nuk ishin më pjesë e tregut të punës”.

Ndërsa, Anisa Zogaj, po ashtu hulumtuese e lartë në GAP, pohoi se sektorët që do të preken më shumë nga emigrimi i popullsisë janë sektori i ndërtimtarisë, sektori i hotelerisë dhe gastronomisë, sektori i tregtisë dhe sektori i prodhimtarisë.

Siç thekson ajo, Gjermania është destinacioni kryesor i emigruesve dhe se kushtet ekonomike janë ndër arsyet kryesore që i nxisin qytetarët që të emigrojnë.

“Sektorët që pritet të preken në masë më të madhe nga largimi i punonjësve në periudhë afatshkurtër dhe afatmesme janë ata të sektorit të ndërtimtarisë (18.7%), hotelerisë dhe gastronomisë (18.7%), tregtisë (18.1%) dhe prodhimit (12.9%)”, tha Zogaj.

“Të njëjtit janë ndër sektorët me numrin më të lartë të të punësuarve dhe ku produktiviti i punonjësve është i lartë, mirëpo ku pagat vazhdojnë të mbesin të ulëta. Në këta sektorë pritet rritje e pagave krahasuar me sektorët tjerë. Në vitin 2023 vërehet të ketë pasur ndryshim të pagave në tregun e punës në Kosovë, ku rreth 27.4% e të punësuarve të anketuar kanë raportuar rritje të pagave”.

Ajo shtoi se rreth 45 për qind e të anketuarve, “në vitin 2023 ishin të punësuar me punë të rregullt (39.3 për qind të punësuar në sektorin privat dhe 5.8 për qind në sektorin publik)”.

“Arsyet ekonomike dalin të jenë mbizotëruese në marrjen e vendimit për të emigruar. Mbi 20 për qind e personave që planifikojnë të emigrojnë kanë realizuar të hyra në muajin e fundit prej 301-450 euro, ndërkaq 32.9 për qind nuk kanë realizuar fare të hyra”.

Sipas Zogaj, shumica e qytetarëve që planifikojnë të emigrojnë “janë persona që kanë të përfunduar vetëm shkollimin e mesëm (57.7 për qind)”.

“Destinacionet kryesore të qytetarëve të cilët planifikojnë të emigrojnë janë Gjermania me 71.4 për qind; ndjekur nga Zvicra me 11.7 për qind; dhe Austria me 5.3 për qind”, theksoi ajo ndër të tjera.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.