Sezoni aktual është futur në sprintin e tij vendimtar.

Derisa lufta për titullin kampion i sheh dy pretendentët kryesorë vetëm tre pikë larg njëri-tjetrit, ajo për ulëset e makinave për sezonin e ardhshëm, është po aq e ashpër.

Shumica e skuadrave ende nuk kanë vendosur se kush do të jenë pilotët për sezonin e ardhshëm.

Por tani, të gjithë kanë filluar të mendojnë se kush do të jenë pilotët e duhur për risinë e rregullave të reja.

Një ndër pikëpyetjet më të mëdha, është se kush do të jetë krah Hamilton-it te Mercedes-i në sezonin e ardhshëm.

Emri më i përmendur është George Russell.

Shefi i Mercedes-it, Toto Wolff, ka konfirmuar për media që vendimi është marrë, për pilotin i cili do të ulet në bolidin e argjendtë sezonin e ardhshëm.

Zërat edhe më shumë i ka shtuar interesimi i Alfa Romeo-s për Valteri Bottas.

Skuadra italiane është e interesuar për shërbimet e pilotit finlandez, si zëvendësues i Kimi Raikkonen, që pritet të dorëhiqet në fund të këtij sezoni.

Kjo hap rrugën për rikthimin e Albon në F1 dhe lëvizjen e shumëpritur të George Russell te Mercedes-i.