Lëvizja “Shqipëria Bëhet” denoncon mungesën e ilaçeve anti-alergjike, kallëzim në SPAK për Koçiun

Adriatik Lapaj nga lëvizja “Shqipëria Bëhet” ka denoncuar mungesën e ilaçeve anti-alergjike.

Sipas tij, së fundi dy pacientë kanë humbur jetën si pasojë e kësaj mungese.

Lapaj ka vijuar duke thënë se u “kryqëzuan” pesë mjekë në lidhje me atë që ndodhi tek Onkologjiku, por problemi i vërtetë është me sistemin.

Ndër të tjera, ai ka paralajmëruar ministren e Shëndetësisë Albana Koçiu, se do të ketë kallëzime në Prokurorinë e Posaçme SPAK në lidhje me këtë çështje.

“Nuk është problemi te pesë mjekë. por te një sistem që nuk siguron ilaçe. Mund të mos kemi autostradat, teatrot e pishinat sportive më të mira në botë, por nuk mund të mendohen tavanet në buxhet për ilaçe”, ka shtuar ai.

“Po ju paralajmëroj, edhe mjekët e shoqëria duhet të reagojnë. Çfarë do të thotë ministria nëse nesër një nga pacientët ndërron jetë? Thirrje ministres së Shëndetësisë, do të shihemi në SPAK për këtë çështje dhe të tjera. Thirrje Ramës, siguro ilaçe dhe hiq dorë nga avionët privatë”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.