![](https://albanianpost.com/wp-content/uploads/2024/07/Capturetrhbgyt.gif)
Volodymyr Zelensky flet për një “samit paqeje me rusët deri në nëntor”, por edhe për nevojat e luftës dhe se aleatët vazhdojnë të mbështesin ushtarakisht ukrainasit, sikur konflikti të vazhdonte për një kohë të gjatë.
Në konferencën e tij të parë për shtyp në Kiev me gazetarët vendas, sapo u kthye nga samiti i NATO-s në Washington, presidenti ukrainas nuk e ka të vështirë të fshehë kompleksitetin dhe pasiguritë e momentit.
Deklaratat e tij të para kanë të bëjnë me projektin e “konferencës së dytë ndërkombëtare të paqes, e cila pason atë në mes të qershorit në Zvicër, në të cilën këtë herë duhet të marrë pjesë edhe një delegacion rus”.
“Unë i kam vënë vetes synimin që të arrij në nëntor me një plan paqeje gati”, shton ai.
Duhet të sqarohet se projekti ishte paralajmëruar tashmë gjatë ngjarjes dyditore zvicerane.
Lajmi tani është se Zelensky nuk e vendos më tërheqjen e armikut nga territoret e pushtuara si parakusht dhe as rënien e regjimit të Putinit, siç e kishte thënë disa herë pas mbajtjes së referendumeve farsë të kërkuara në shtator 2022 nga rusët.
Megjithatë, me një inspektim më të afërt, nisma e Zelenskyt bëhet më e ndërlikuar në zbatimin e saj praktik.
Në thelb, pyetja ende pa përgjigje është: çfarë do të thotë “Nëntori”, para apo pas zgjedhjeve presidenciale amerikane?
Në Kiev askush nuk sqaron.
Por komenti më i përhapur mbetet se asgjë konkrete nuk do të ndodhë para se të mësohet se kush do të jetë fituesi i sfidës për Shtëpinë e Bardhë.
Zëvendësministri i Jashtëm rus tashmë ka deklaruar se vendi i tij nuk ka ndërmend të marrë pjesë në konferencën e Zelenskyt.
Zëdhënësit e Kremlinit mbetën më të paqartë, duke folur për propozimet e Ukrainës “pa peshë”.
Putini ka përsëritur disa herë se nuk e konsideron më Zelenskyn një partner të barabartë: e tij është një sfidë globale kundër NATO-s, ai synon të trajtohet si lider i një superfuqie dhe për këtë arsye i vetmi bashkëbisedues legjitim, në sytë e tij, është presidenti i ardhshëm i SHBA-ve.
Zelensky gjithashtu është më se i vetëdijshëm për këtë dhe dje deklaroi se ishte “i gatshëm të punonte me Trump nëse ai zgjidhej”.
“Unë nuk kam frikë nga kjo, dua t’ju them se shumica e Partisë Republikane mbështet Ukrainën”, tha ai.
Në përpjekje për të mbajtur gjallë rrugën diplomatike, mund të studiohen iniciativa paralele që synojnë garantimin e sigurisë energjetike të Ukrainës, lundrimin e lirë në Detin e Zi dhe shkëmbimin e të burgosurve midis Kievit dhe Moskës.
Kërkesat e luftës, megjithatë, trokasin në derë.
Zelensky përsërit se Ukrainës i duhen urgjentisht “të paktën 25 bateri të raketave tokë-ajër Patriot” për të ndaluar bombardimet ruse.
Edhe gjuajtësit F-16 të premtuar nga aleatët janë shumë të paktë dhe po mbërrijnë ngadalë.
Në fushat e betejës situata mbetet shumë e ndërlikuar.
Ushtarët ukrainas arritën të ndalojnë avancimin rus përpara Kharkiv, por gjërat po shkojnë keq në Donbas.
Rusët kryejnë bombardime me qilim, kanë pushtuar fshatin Urozhaine dhe po bëjnë presion mbi Chasiv Yar.
Marrë nga “Corriere della Sera”, përshtatur për “Albanian Post”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com