Levits: E mirëpresim anëtarësimin e Kosovës në organizata ndërkombëtare

Presidenti i Letonisë, Egils Levits, në konferencë për media ka thënë se shteti i tij i kupton aspiratat e Kosovës si shtet demokratik.

Kjo pasi edhe ai vetë e konsideron si shumë të rëndësishme që Kosova të anëtarësohet në organizata ndërkombëtare.

“Mendoj që është e rëndësishme që të anëtarësohet Kosova në organizatat ndërkombëtare e forume, do të përmendja këtu Këshillin e Evropës. Ne do të mirëpritnim aplikimin e Kosovës në Këshillin Evropës. Sa i përket BE-së Letonia është duke e mbështetur Kosovën sa i përket liberalizimit të vizave”.

“Tani nuk ka pengesa të arsyeshme që të mos jepet liberalizimi i vizave. Ne kemi vërejtur që viti i kaluar ishte shumë i suksesshëm në këtë drejtim luftimi i korrupsionit”.

Ai foli edhe për dialogun Kosovë-Serbi, për të cilin tha se vëren që ka probleme, por shprehu besimin se bisedimet do të vazhdojnë.

“Po e vërej që ekzistojnë disa probleme sa i përket dialogut me Serbinë, shpresoj që këto bisedime do të përparojnë”.

Sipas tij, as Letonia dhe as Kosova nuk kanë ndonjë armik.

Ai deklaroi se situata në Evropa ka pasur ndryshime pas pushtimit rus.

“Në qoftë se shohim situatën e tanishme në Evropë mund të themi se kemi një ndryshim në muajt e fundit pas agresionit rus në Ukrainë. Arkitektura e sigurisë së Evropës duket të ripërtërihet dhe të bazohet në realitet. Realiteti është se duhet të ballafaqohemi me një Rusi agresive. Tani është koha e duhur për ta bërë këtë hap të mirë varet nga NATO-ja”, ka thënë ai.

Presidenti i Letonisë, Egils Levits, është pritur të premten e 22 prillit me nderimet më të larta shtetërore, nga presidentja e Kosovës, Vjosa Osmani.

Levits, në mesditë do të takohet edhe me kryetarin e Kuvendit të Kosovës, Glauk Konjufca.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.