Plot një mijë e 35 vizitorë.
Ky numër shoqëroi atë që quhet “Leviatani Mekanik”, ekspozita e prezantuar në Qendrën për Hapje dhe Dialog (COD) në Shqipëri nga artisti Ergys Krisiko, e cila së bashku me “I have a dream” nga Jutta Benzenberg, tërhoqi vëmendjen e shumë vizitorëve.
Të ftuarit në ceremoninë e hapjes ishin të parët që u përfshinë në skenografinë mitologjike, ku vepra ngacmon imagjinatën, duke e grishur vizitorin të fantazojë më tej.
Pikërisht “Kuajt” që kanë tërhequr vëmendjen e të gjithëve, vendosur te shkallët e Kryeministrisë në Tiranë, ishin pjesë e kësaj ekspozite nga artisti Krisiko.
Por ku qëndron simbolika e tyre?
“Leviatani mekanik” u prezantua nga imazhi i tre kuajve që në hyrje të godinës së Kryeministrisë, të cilat në njëfarë mënyre njoftuan tablonë e ekspozitës që vijoi në brendësi të COD-it.
Sipas artistit Ergys Krisiko dhe kuratores Ajola Xoxa, ata konsiderohen si mbretër të natyrës së egër sypatrembur përballë “përbindëshit” që ka pushtuar ambientet e Kryeministrisë.
Efekti i Errësirës brenda ambientit të ekspozitës përforcoi simbolikën e saj që lidhej me filozofinë e Hobbes, rreth absolutizmit të pushtetit.
Kuratorja Xoxa, në përshkrimin e Thomas Hobbes si absolutist, tha se ai beson që njeriu është i keq në thelb dhe se njeriu, nëse lihet në gjendjen e tij të lirë, do ta vrasë njeriun.
“Kemi parë tentativa të ndryshme për ta marrë fizikisht këtë ndërtesë. A thua se pushteti qëndron te muret. Apo Leviatani janë njerëzit, apo Leviatani janë ata që e japin fuqinë, pra është populli?!”, përshkroi Xoxa.
Çfarë është Leviathan?
Leviathan është një krijesë mitologjike që përmendet në Biblën e Shenjtë, veçanërisht në Dhjatën e Vjetër.
Në terma të përgjithshëm, një krijesë deti që përfaqëson kaosin dhe të keqen përpara krijimit të botës.
Kjo krijesë do të ishte krijuar nga Zoti.
Thomas Hobbes Leviathan
Leviathan është titulli i një libri nga Thomas Hobbes botuar në vitin 1651, në të cilin filozofi reflekton mbi fuqinë e Shtetit, me synimin për të justifikuar qeveritë absolutiste.
Për Hobbes, fjala Leviathan bëhet një imazh i fuqisë së Shtetit.
Kështu e shpreh Hobbes në tekst, kur tregon se ajo që quhet republikë ose shtet është, metaforikisht, një Leviathan i madh, një qenie jo-njerëzore ose, konkretisht, një njeri “artificial” i destinuar për të mbrojtur njeriun natyror.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
