Lekaj, Kurtit: Aman mos shko rrugës së Rrahman Morinës

“Ose je Albin Kurti si patriot, ose je tradhtar si Rrahman Morina”, ka thënë deputeti i Aleancës për Ardhmërinë e Kosovës (AAK), Pal Lekaj, në fjalën e tij në kuvendin e Kosovës drejtuar kreut të ekzekutivit kosovar.

“Sot nuk po e shoh një Albin Kurt që e kam parë si patriot, po më vjen keq që po e shoh në këtë gjendje të mjerueshme”, theksoi Lekaj.

“Aman mos shko rrugës së Rrahman Morinës”, i tha Lekaj Kurtit.

Duke iu referuar fjalës së kryeministrit, ku raportoi për zhvillimet e fundit në dialogun me Serbinë, posaçërisht pas pranimit të draftit për Asociacionin, deputeti Lekaj tha të ketë menduar se Kurti do t’i qasej një dokumenti, mbi të cilin do të diskutonin dhe do ta analizonin.

“Por, ja që fjalët e Kurtit mu dukën si ato flluskat e balonit, që s’kanë peshë, amo fare peshë”, tha Lekaj.

Ish-ministri i Infrastrukturës ritheksoi se për atë se çfarë ndodhi më 24 shtator, pra pas sulmit terrorist në Banjë të Zveçanit, “të kemi dhënë mbështetje të fuqishme”, teksa shtoi se “kemi menduar që do t’i qasesh dialogut edhe Asociacionit me seriozitetin më të madh dhe me ndjenjat më të mira për shtetin e Kosovës”.

“Kur keni thënë që nuk ulemi në tavolinë pa e sanksionuar Serbinë, besom që ju kemi besuar. Keni thënë që nuk shkojmë në dialog pa ia hequr sanksionet Kosovës, përsëri ju kemi besuar”, pohoi Lekaj.

“Keni thënë që ‘Zajendica’ nuk kalon dhe Asociacioni është i vdekur, më vjen që shefja e diplomacisë [Donika Gërvalla] nuk është këtu”, potencoi Lekaj, duke shtuar se kjo e fundit ka pasur “fjalor të keq ka pasur në diplomaci sa që nuk e di [drejtuar Kurtit] se pse nuk e keni shkarkuar”.

“Edhe kryetari i kuvendit [Glauk Konjufca] thoshte se nuk ka Asociacion as me kompetenca ekzekutive, as pa kompetenca, dhe ja çfarë u bë tash”.

Sipas Lekajt, kryeministri Kurti dhe partia e tij, Lëvizja Vetëvendosje për 10 vite kanë “bërë politikë populiste”.

“10 vite i keni mashtruar qytetarët, 10 vite ka pasur viktima kundër Asociacionit. Keni shkelur mbi familjet e të pagjeturve dhe të zhdukurve. Ku janë kërkesat e thirrjet e nënave të Gjakovës, ku janë kërkesat e familjarëve të të pagjeturave”, shtoi.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.