Lea Ypi të mërkurën promovon librin në Prishtinë, të enjten ligjëron në Universitetin e Prishtinës

Autorja dhe filozofja shqiptare, Lea Ypi, promovon librin e saj “Të lirë: të rritesh në fund të historisë” edhe në Prishtinë, përkatësisht në Librarinë “Dukagjini”, më 5 janar në ora 18:00.

Vepra e Lea Ypit është senzacion letrar dhe filozofik, dhe gjatë tërë vitit të kaluar pushtoi katallogjet më të mëdha letrare dhe zuri ballinat e gazetave më prestigjioze botërore.

“Të lirë: të rritesh në fund të historisë”, thënë në fjalët e autores, është pjesërisht autobiografi, pjesërisht filozofi politike, ku autorja prej fëmijërisë së saj e gjen veten të ngërthyer pas dy koncepteve antagoniste të “Lirisë”.

Tranzicioni historik që pëson Shqipëria, prej rënies së komunizmit e drejt ngritjes së liberalizmit rrëfehet nga autorja me dëlirësi letrare dhe filozofike.

Në mes të këtij tranzicioni politik dhe shoqëror, gjejmë edhe tranzicionin personal të autores, e cila “po rritet në fund të (H)istorisë”.

Gjithashtu filozofja Lea Ypi do të ligjërojë në Fakultetin Filozofik të Universitetit të Prishtinës, të enjten më 6 janar në ora 12, me temën “Marksizmi kantian: pse na duhet?”, në një ligjëratë të organizuar nga Shoqata e Filozofëve të Kosovës.

Lea Ypi është ligjëruese e filozofisë politike në London School of Economics në Londër, dhe është prej figurave më prominente në filozofinë e Marksit dhe Kantit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.