Le të drejtojë solfezhi njëherë

“Pa muzikën, jeta do të ishte një gabim.”

Mbase kjo frazë e lënë prerazi nga Friedrich Nietzsche, e brendashkruan pa gabim nevojën për praninë e tingujve.

Atë domosdoshmëri për të ndjerë të ‘qarin’ e violinës teksa harku cek në telat e saj ose për të shijuar të ëmblën melodi të pianos kur shkelen tastet.

Atë domosdoshmëri për t’u endur në ndjesi, sa në hare e sa në plogështi.

E kur shijet e këtyre skajeve arrijnë te fëmijët, aty nuk ka më vend për gabim.

I lihet solfezhit t’i udhëheqë.

Tingujt ndikojnë

Mësuesja e muzikës, Pllume Lami, e ka vërtetuar ndikimin pozitiv të muzikës te fëmijët e shkollave nëpërmjet një studimi të realizuar prej saj, të cilin e ka ndarë me Albanian Post.

Kërkimi është bazuar në dy shkolla të qytetit të Shkodrës, ndryshe në “djepin e kulturës shqiptare”. Konkretisht, në shkollën artistike “Prenkë Jakova” dhe atë 9-vjeçare “Skënderbej”.

Një përzgjedhje e qëllimshme kjo prej saj për të nxjerrë në pah dallimet mes tyre.

Lidhur me gjetjet e kërkimit, Lami tregon se “është vërejtur se muzika është faktor nxitës në zhvillimin e komponentëve themelorë në muzikë, bazë për zhvillimin e aftësive të përgjithshme te fëmijët”.

Prandaj dhe ajo rekomandon “rritjen e numrit të orëve të muzikës në shkolla dhe rishikimin e Planit Mësimor të Arsimit Bazë, për mësimin e instrumentit muzikor kitarë/piano, proces i cili do të ndihmojë më së miri zhvillimin e aftësive të nxënësve”.

“Dëgjimi muzikor është një proces që ndikon në aspektin emocional te fëmijëve. Orientimi i drejtë mbi llojin e muzikës që duhet dëgjuar, mbështetet në një edukim që i orienton drejt preferencat e fëmijëve, i edukon ata për shijet muzikore, të kuptojnë elementet muzikore mbi të cilat zhvillohet muzikaliteti dhe emocioni”, shpjegon mësuesja.

Kështu, nxënësit kthehen në dëgjues të edukuar ndaj muzikës, duke e bërë muzikën një mjet që shkakton reagime pozitive emocionale te ta.

“Orientimi dhe përcaktimi i zhanreve muzikore për të ruajtur fëmijët nga ndikimet negative të një muzike jo cilësore është me rëndësi. Mësuesi duhet të tregohet i vëmendshëm për ti ndihmuar e inkurajuar të talentuarit, sipas prirjeve që shfaqin në këngë, valle, instrument”, ka dalluar Lame.

Referuar kërkimit, luajtja në instrument ka dal se shkakton emocione pozitive te fëmijët. Madje, në moshat e vogla parapëlqehet vendosja e instrumenteve të ndryshme në duart e fëmijëve, duke i nxitur ata të luajnë dhe provojnë kënaqësinë e tingujve dhe të ritmit.

“Efekteet emocionale dhe kënaqësia e përdorimit të instrumenteve muzikore është pranuar nga mësuesit, nxënësit, prindërit dhe psikologët e pyetur”, tregon ajo.

Për të arritur këtë, sipas Lamit, nevojitet plotësimi i infrastrukturës së shkollave me instrumente muzikore dhe mjedise fizike që të aftësojnë nxënësit në instrumente të ndryshme.

Dhe se istrumenti më i mirë është ai që secili zgjedh sipas dëshirës.

“Progrmi mësimor si një dokument zyrtar, i cili trajton përmbajtjen mësimore, ndihmon që përmes aktiviteteve muzikore që zhvillohen në shkolla, të shkaktohet kënaqësi”, pohon mësuesja.

Nisur nga kjo, shtimi i aktiviteteve muzikore është njëkohesisht mundësi për të shtuar emocionet pozitive dhe kënaqësinë te femijët.

“Aktiviteti artistik dhe jeta e pasur artistike muzikore, është forma më e mirë për të zhvilluar shprehitë e lindura”, ravijëzon Lami.

Ajo sugjeron se mësimi i muzikës vlen të trajtohet si një formë për të përmirësuar të nxënit.

“Shpeshherë, muzika përdoret si një aktivitet për të përmirësuar të nxënin e femijëve të shkollave ose për përmirësimin e stresit, ankthi e në përgjithësi, pranohet se muzika ndihmon në përmirësimin e të nxënit”, tregon ajo mbi gjetjet.

Lami përmbyll se shtimi i aktiviteteve muzikore të shumllojshme, ofron mundësi për të ndikuar pozitivisht dhe për të përmirësuar të nxënit te fëmijët në shkollë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.