Lidhja Demokratike e Kosovës (LDK) po vazhdon të mbajë konferencën për media të organizuar pas arrestimit të dy zyrtarëve të Ministrisë së Industrisë së Kosovës dhe biznesmenit, Ridvan Muharremi, pronar i furrës së shndërruar në restorant, “Bukë e zemër”.
Kësisoj, zyrtari i kësaj partie, Berat Rukiqi ngjarjet e sotme i ka quajtur “pjesë të mozaikut të sistemit korruptiv e kriminal” që thotë ta ketë “instaluar”, Lëvizja Vetëvendosje (LVV).
“Ky rast është pjesë e mozaikut të gjerë e të gjatë të sistemit korruptiv dhe kriminal të instaluar nga Lëvizja Vetëvendosje në të gjitha nivelet e qeverisjes”, ka thënë ai.
“Pushteti ka treguar paaftësi të jashtëzakonshme për të qeverisur dhe aftësi të jashtëzakonshme dhe zell për kapjen e shtetit dhe për shtrirjen e aktivitetit kriminal e korruptiv në të gjitha nivelet”, ka shtuar Rukiqi.
Tutje, Rukiqi ka thënë se situata aktuale pasqyron “funksionimin e një rrjeti kriminal” që sipas tij e ka aprovimin “e niveleve të larta politike”.
“Afera milionëshe me rezervat shtetërore që sot është tema kryesore e ditës, të gjitha indikacionet dhe faktet e publikuara deri më tani, të gjitha ndërlidhjet që i kemi pa deri më tani na japin shenjat që ky nuk është veç një rast korruptiv”, ka thënë Rukiqi.
“Të gjitha elementet na çojnë deri tek një rrjet i mirëorganizuar i krimit që ka aprovimin e niveleve të larta politike”, ka shtuar ai.
Përndryshe, pas hetimeve nga Prokuroria Speciale janë arrestuar dy zyrtarë të Ministrisë së Industrisë, Ndërmarrësisë dhe Tregtisë dhe gjithashtu Ridvan Muharremi, pronar i furrës të shndërruar në restorant “Bukë e Zemër”, i cili është i afërt me Kryeministrin e Kosovës, Albin Kurti, dhe për të cilin u kuptua se Qeveria e kishte angazhuar për rezervat shtetërore ku dyshohet të jenë keqpërdorur rreth 10 milionë euro.
Dy zyrtarët e arrestuar, Hafiz Gara, drejtor i Divizionit për Rezervat Shtetërore të Mallrave dhe Irfan Lipovica, drejtor i Departamentit për Integrime Evropiane dhe Koordinim të Politikave, janë dy personat që janë përmendur edhe në përgjimet e publikuara nga mediumi Nacionale.
Të dy këta dyshohet të kenë marrë pjesë në keqpërdorime për grurin dhe vajin e rezervave shtetërore.
Por, një nga të dyshuarit kryesor në këtë afër është pikërisht Muharremi, i cili është pronar i restorantit “Bukë e Zemër”.
Ai ishte angazhuar nga Qeveria për të gjetur kompanitë nga ku do të bliheshin mallrat për rezervat, por përkundër se pagesat u kryen, një sasi e konsiderueshme nuk erdhi asnjëherë.
Madje, një kompani polake nga ku kishin blerë sasi të ndryshme pasi u pagua u zhduk meqë konsiderohet se është një kompani fantomë.
Avokati i Muharremit, Mahmut Halimi, në deklarimin e parë pas arrestimit të klientit të tij e quajti atë të pafajshëm, derisa tha se “i ka dorëzuar të gjitha materialet që i kemi përgatitur me kohë”.
Policia e Kosovës filloi bastisjet të premten në mëngjes. Përveç zyrave të MINT dhe restorantit të Muharremit, janë basitisur edhe lokacione të tjera.
Nga pamjet e bastisjes janë parë policë duke nxjerrur dokumente të shumta dhe prova të tjera të cilat do të shqyrtohen në proces.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
