Lajçaku midis “postit të ri” dhe “krizës së dinarit” ndërsa BE-ja përgatitet për zgjedhje

Në një kohë kur Bashkimi Evropian (BE) paralajmëroi presion ndaj Kosovës e Serbisë në kuadër të dialogut për normalizimin e marrëdhënieve, një ndër protagonistët kryesorë që aktualisht mbulon pjesën më të madhe të “kërkimit të madh” për “formulën e zgjidhjes” pritet të bëhet ambasador i BE-së në Zvicër – një lëvizje që pritet ta ngadalësojë ritmin e procesit.

Emisari Special i BE-së për dialogun midis Prishtinës dhe Beogradit, Mirosllav Lajçak, pritet të marrë “post të ri” në shtator të këtij viti, ndërsa blloku përgatit poste të reja diplomatike në prag të zgjedhjeve për Parlamentin Evropian (PE) në qershor. E lajmi për rikonstruktimin e diplomacisë evropiane vjen kur Lajçaku kërkon zgjidhje për dinarin.

Lajçaku shpejt do të takojë kryenegociatorët e Kosovës dhe Serbisë – Besnik Bislimi dhe Petar Petkoviç – pas dështimit të ciklit të fundit të negociatave në Bruksel të Belgjikës. Në takimet e javës së kaluar në kuadër të procesit të dialogut që u zhvilluan nën ndërmjetësimin dhe kujdesin e Lajçakut në kryeqendre evropiane, palët sërish nuk arritën gjuhë të përbashkët.

Sidoqoftë, ende nuk dihet se kush do ta zëvendësojë Lajçakun në postin e të dërguarit të posaçëm për dialogun për normalizimin e marrëdhënieve mes Kosovës dhe Serbisë, duke qenë se mandati i diplomatit sllovak përfundon në fund të gushtit. Megjithatë, deri atëherë pritet të vazhdojnë përpjekjet diplomatike të BE-së, ndonëse procesi i dialogut mund të mbetet periferik.

Lajçaku në janar i kërkoi Kosovës dhe Serbisë që të çojnë përpara procesin e normalizimit të marrëdhënieve para zgjedhjeve evropiane në qershor të këtij viti, duke përmendur gjithashtu që edhe Shtetet e Bashkuara të Amerikës (SHBA) do të shkojnë në zgjedhje në nëntor: “Kjo do të thotë se vëmendja, natyrisht, në fund të këtij viti, do të përqendrohet në këto procese”.

Përkundër se është ende herët për të pasur vlerësime të qarta, duke qenë se përbërja e institucioneve do të dihet në vjeshtën e vonë, rikonfigurimi i raportit të forcave do të ndryshojë dinamikën kontinentale e cila jo-domosdoshëmrisht shkon në favor të kosovarëve. Kosova shpejt do ta gjejë veten në rolin e spektatores së zhvillimeve politike brenda BE-së.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.