Lajçak në samitin “BE-Ballkani Perëndimor”: Unioni është gati për zgjerim pas një kohe të gjatë

I Dërguari Special i Bashkimit Evropian (BE) për dialogun Kosovë-Serbi, ka thënë se Unioni për herë të parë pas një kohe të gjatë është i gatshëm për zgjerim.

Këto komente, top-diplomati sllovak i ka bërë përmes një postimi në platformën X, pas samitit “BE-Ballkani Perëndimor”, që u organizua nga organizata “Miqtë e Evropës”.

“Në samitin e sotëm për Ballkanin theksova se për herë të parë pas një kohe BE-ja është gati për zgjerim. Është koha për të përfituar nga kjo mundësi”, ka shkruar diplomati sllovak.

At today’s @FriendsofEurope #BalkansSummit I stressed that for the first time in a while 🇪🇺 is ready for enlargement. It’s high time to seize the opportunity. pic.twitter.com/BUm5JPrsNS

— Miroslav Lajčák (@MiroslavLajcak) December 7, 2023

Gjashtë (6) vendet e Ballkanit Perëndimor, përkatësisht Shqipëria, Kosova, Bosnja e Hercegovina, Mali i Zi, Maqedonia e Veriut dhe Serbia, synojnë anëtarësimin në BE.

Mirëpo, sa i përket procesit të anëtarësimit, atëherë këto vende janë në faza të ndryshme.

BE tashmë po negocion anëtarësimin me Maqedoninë e Veriut, Malin e Zi, Shqipërinë, Serbinë, Malin e Zi dhe Maqedoninë e Veriut, derisa Kosova është një kandidat potencial.

Nga ana tjetër, po në këtë samit Lajçak, ka thënë se ka progres në zbatimin e disa marrëveshjeve të arritura në dialogun mes Kosovës dhe Serbisë.

“Normalizimi i raporteve mes Kosovës dhe Serbisë është një çështje me rëndësi strategjike. Pa këtë normalizim nuk mundemi as të ëndërrojmë të ardhmen evropiane. Kemi progres kohëve të fundit në këtë drejtim”, tha Lajçak.

“Së shpejti do ta mbyllim dosjen e energjisë, ka progres në çështjen e targave, në çështjen e personave të pagjetur, në çështjen e zgjedhjeve lokale në veri dhe në zbatimin e marrëveshjes për rrugën drejt normalizimit të raporteve”, shtoi ai, duke shtuar se ai është në kontakt të vazhdueshëm me palët për të vazhduar me zbatimin.

Top-diplomati sllovak ka bërë thirrje që të mos humbet koha për implementimin e obligimeve që janë derivat i dialogut dhe të mos humbet rasti për avancim në rrugëtim drejt BE-së.

Lajçak ka theksuar se viti i ardhshëm do të jetë një vit me kalendar të ngjeshur politik, sepse do të ketë zgjedhje në Bashkimin Evropian dhe në Shtetet e Bashkuara të Amerikës.

Në vlerësimin e sllovakut, momentalisht është një moment i ti në procesin e zgjerimit, që është shumë më i favorshëm sesa më parë. Ky moment i ri, tha ai, “është krijuar nga Presidenti i Federatës Ruse, Vladimir Putin, dhe agresioni i tij ndaj Ukrainës”.

Megjithatë, Lajçak potencoi se “gjeopolitika e ka hapur derën për integrim në BE, por ajo nuk do t’ju kalojë vetvetiu juve përmes kësaj dere, sepse për një gjë të tillë duhet të përmbushen kushtet”.

“Për herë të parë e shoh BE-në më të gatshme për Ballkanin sesa Ballkani për BE-në”, pohoi ai, duke përsëritur që vendet e rajonit duhet t’i zgjidhin të gjitha çështjet e hapura mes tyre, në mënyrë që një ditë të mos mund të bllokojnë njëra-tjetrën në rrugën drejt BE-së.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.