Lajçak: Mali i Zi duhet të zbatojë sanksione kundër Rusisë sa më shpejt të jetë e mundur

I dërguari i posaçëm i Bashkimit Evropian për Ballkanin Perëndimor Miroslav Lajçak, tha se Mali i Zi duhet të marrë një vendim për zbatimin e masave kufizuese të BE-së kundër Rusisë sa më shpejt të jetë e mundur, shkruan REL.

Në një bisedë me ministrin e Jashtëm malazez Gjorgje Raduloviç në margjinat e takimit ministror të NATO-s në Bruksel, Lajçak theksoi se Unioni vlerëson përkushtimin e dukshëm të Malit të Zi për zbatimin e një politike të jashtme të përbashkët.

🇲🇪FM Đorđe #Radulović met with EU Special Representative for the Western Balkans Miroslav Lajčák @MirloslavLajcak in #Brussels. pic.twitter.com/44zOwFgdr5

— MFA Montenegro (@MFA_MNE) April 6, 2022

Duke pasur parasysh situatën aktuale në Ukrainë, ministri i Jashtëm Raduloviç theksoi rëndësinë e integrimit të përshpejtuar në BE të Ballkanit Perëndimor si garantues i sigurisë dhe prosperitetit të rajonit, por edhe të mbarë Evropës, njoftoi kabineti i ministrit Raduloviç.

Javë më parë, qeveria malazeze shmangu marrjen e një vendimi për zbatimin e sanksioneve kundër Rusisë për shkak të agresionit ndaj Ukrainës, megjithëse Ministria e Punëve të Jashtme njoftoi më 1 mars se Mali i Zi iu bashkua sanksioneve të BE-së kundër Rusisë.

Qeverisë së kryeministrit Zdravko Krivokapiç iu dha votë mosbesimi në fillim të shkurtit të këtij viti dhe deri më tani nuk është zgjedhur asnjë i ri.

Brenda Qeverisë, në mandatin teknik janë dy rryma të kundërta, të udhëhequra nga kryeministri Krivokapiç dhe zëvendëskryeministri Dritan Abazoviç.

Ndërsa zëvendëskryeministri Abazoviç këmbëngul që qeveria të miratojë një vendim për zbatimin e sanksioneve ndaj qytetarëve rusë që janë në listën e zezë të Bashkimit Evropian, kryeministri Krivokapiç këmbëngul në formimin e një “trupi koordinues për të monitoruar futjen dhe zbatimin e masave ndërkombëtare në lidhje me kriza në Ukrainë”.

Në seancat e kaluara të Qeverisë nuk ka pasur përkrahje të mjaftueshme nga ministrat për miratimin e ndonjë propozimi.

Pas vendimit për vendosjen e sanksioneve ndaj Rusisë, institucionet qeveritare duhet të ngrijnë pronat dhe burimet ekonomike të qytetarëve dhe kompanive ruse në Mal të Zi dhe të ndalojnë punën e mediave qeveritare ruse. Hapësira ajrore e Malit të Zi është e mbyllur për avionët rusë sepse vendimi formal i Qeverisë nuk ishte i nevojshëm për atë vendim.

Në takimin me të dërguarin evropian Lajçak, ministri Raduloviç përsëriti gatishmërinë e Malit të Zi për të vazhduar monitorimin e vazhdueshëm të politikës së përbashkët të jashtme dhe të sigurisë të BE-së, duke përfshirë bashkimin e të gjitha masave kufizuese të Bashkimit kundër Rusisë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.