Kosova

Lajçak e Ulutas pajtohen se çdo vendim për urën e Ibrit duhet të merret në dialog


Ozkan Ulutas dhe Miroslav Lajçak

Çdo vendim për urën mbi lumin Ibër e cila bashkon Mitrovicën e Jugut me atë të Veriut duhet të merret në kuadër të dialogut të ndërmjetësuar nga Bashkimi Evropian.

Ky është konkluzioni i takimit që i deleguari i BE-së për dialogun, Miroslav Lajçak, ka realizuar të martën me komandantin e KFOR-it, Ozkan UIutas.

“Ata gjithashtu rikonfirmuan se çdo vendim në lidhje me urën e Mitrovicës duhet të merret në kuadër të dialogut të ndërmjetësuar nga BE-ja ndërmjet Beogradit dhe Prishtinës, të cilin NATO vazhdon ta mbështesë, duke përfshirë përpjekjet e KFOR-it. Ky është çelësi për sigurinë e të gjitha komuniteteve. KFOR-i mban një prani fikse në urën e Mitrovicës dhe kryen patrullime të rregullta në zonat përreth”, thuhet në një komunikatë për media e lëshuar nga KFOR-i.

Ndër të tjera komunikata njofton se në takimin me Lajçak dhe Ulutas u “vlerësua bashkëpunimi shumë i ngushtë dhe koordinimi i rregullt ndërmjet KFOR-it dhe BE-së në terren”.

“Si dhe u diskutuan një sërë temash me interes të ndërsjellë që ndikojnë për një mjedis të sigurt për të gjitha komunitetet anembanë Kosovës. Ata përsëritën përkushtimin e tyre për të vazhduar bashkëpunimin në dobi të sigurisë në mbarë Kosovën dhe të stabilitetit rajonal”, shton komunikata.

Diplomati sllovak as takimit rreth më shumë se 1 orë me zëvendëskryeministrin e parë të Kosovës, Besnik Bislimin, në një prononcim të shkurtë për media, ka njoftuar se me kryenegociatorin kosovar kanë diskutuar për nevojën e përshpejtimit të implementimit të Marrëveshjes së Brukselit/Ohrit.

“Arsyeja e vizitës ishte diskutimi se si të rifokusohemi në procesin e normalizimit të marrëdhënieve mes Kosovës dhe Serbis. Ne e kemi një marrëveshje, duhet ta përshpejtojmë implementimin e saj, kjo është çështja parë që e kemi diskutuar sot me Bislimin”, ka potencuar ai.

Çështja e dytë që u diskutua në takim me Bislimin, sipas Lajçak, ka qenë Plani i Rritjes së BE-së për Ballkanin Perëndimor.

“Për Kosovën e Serbinë ky disbursim i fondeve është i kushtëzuar me angazhimin konstruktiv në dialog dhe këtu jam unë ai që duhet të bëjë këtë vlerësim për konstruktivitetin. Mu për këtë kemi diskutuar se si të arrijmë te vlerësimi pozitiv”, ka shtuar Lajçak.

I pyetur për raportin e Shefit të Diplomacisë së BE-së, Josep Borrell, për heqjen apo jo të masave ndëshkuese të Unionit ndaj Kosovës, diplomati sllovak, ka njoftuar se kjo çështje do të diskutohet të mërkurën në mes të vendeve anëtare të Unionit.

“Aq sa di çështja e masave do të diskutohet nesër në sektorin politik të vendeve anëtare dhe gjithçka do të varet prej këtyre diskutimeve. Nesër do ta kuptoni se çka ka në raport, mua nuk më lejohet të them asgjë sot”, ka thënë ai.

Paçka, ai ka potencuar se personalisht është në favor të largimit të masave ndëshkuese ndaj Kosovës.

“E kam bërë të qartë qëndrimin tim për sa i përket masave, që në shtator, kur kam rekomanduar që këto të hiqen. Por siç e thashë, nuk jam pjesë e këtij procesi, ky është vendim i shteteve anëtare. Qëndrimi im personal është që ato duhet të hiqen”.

Lajçak gjatë prononcimit ka bërë të ditur se i është kërkuar të vazhdojë punën si ndërmjetësues i dialogut Kosovë – Serbi, deri në fund të muajit janar.

Po ashtu, Lajçak është pyetur se pse nuk është takuar me kryeministrin e Kosovës, Albin Kurti.

“Kryeministri Kurti nuk është brenda vendit, për këtë s’kemi pasur takim”, ka njoftuar ai.

Diplomati sllovak pas Kosovës, do të udhëtojë në Serbi.

Të mërkurën Lajçak pritet të takohet me presidentin e Serbisë, Aleksandër Vuçiç.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore