Laçi nuk ka shkuar përtej një barazimi 1:1 në udhëtim te Kastrioti, kështu duke u shkëputur nga vendi lideri Tirana për tetë pikë.
Kjo ishte ndeshja e tretë radhazi pa fitore për bardhezinjtë Mirel Josës, të cilët thuajse kanë humbur gjasat për titull kampion dhe duhet të mendojnë për pjesëmarrje në Evropë.
Ekipi kurbinas luajti më mirë, kaloi në avantazh me Saiou Guindo, i cili tregoi aftësitë si bomber me një goditje të menjëhershme në minutën e 21-të, ndërkohë që dy minuta më parë humbi një mundësi të artë.
Laçi gjeti golin e dytë pas gjysmë ore lojë. Guindo dërgoi topin në rrjetë, por goli u anulua për pozicion të parregullt të Adelekes.
Pjesa e parë përfundoi me epërsi minimale të mysafirëve, teksa në të dytën vendasit barazuan rezultatin në minutën e 58-të me golin e shënuar nga braziliani Kaina.
Deri në fund të sfidës, raste për gol pati nga dyja skuadrat, por portat mbetën të paprekura.
Në ndeshjen tjetër, Teuta ka fituar tre pikë të vlefshme në ndeshjen ndaj Egnatias, duke mos rrezikuar zonën e play out-it.
Durrsakët morën fitoren minimale 0:1 në transfertë, duke realizuar në minutën e 27-të me Klejdi Dacin.
Pjesa e parë e kësaj sfide ishte deri diku e balancuar, ndërsa në fraksionin e dytë ritmin e lojës e diktuan rrogozhinasit.
Egnatia pati disa raste për të realizuar në portën e Demës, megjithatë lojtarët e Ramadanit nuk ia dolën që të shfrytëzonin mundësit dhe të dilnin me të patën një pikë nga kjo sfidë.
Pas këtij takimi Teuta vijon të renditet e gjashta, por tashmë me 28 pikë, teksa Egnatia qëndron në vend të shtatë me 23 pikë në 24 ndeshje të luajtura.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
