Lajme

Kuvendi maqedonas debaton për zgjedhjen e Qeverisë së re – Ajo zgjidhet deri në mesnatë


Kuvendi i Maqedonisë së Veriut

Në Kuvendin e Republikës së Maqedonisë së Veriut po vazhdon në ditën e dytë seanca plenare me pikën e vetme të rendit të ditës – zgjedhja e Qeverisë.

Sipas Rregullores së punës së Kuvendit maqedonas, diskutimi për programin dhe përbërjen qeveritare zhvillohet dy ditë.

Seanca plenare ka filluar të shtunën, ndërkaq votimi i Qeverisë së re duhet të bëhet para mesnatës të së dielës së 16 janarit.

Deputetët e opozitës nga VMRO-DPMNE nuk po ndajnë qëndrime të njëjta me at të pozitës nga LSDM dhe BDI, andaj është duke vazhduar debat i nxehtë mes tyre.

Sipas opozitës, pushtetarët dëshmohen vetëm për korrupsionin dhe jo-profesionalizmin e tyre dhe populli është i lodhur nga pagat e ulëta, taksat e larta dhe politikat katastrofike.

Nga ana tjetër, partitë në pushtet mbeten të mendimit se kjo Qeveri ka legjitimitet të plotë.

Deputetja e LSDM-së, Daniela Koleva në seancë plenare tha se Qeveri ka edhe besueshmëri që nga zgjedhjet e fundit parlamentare, të cilat u konfirmuan nga mazhoranca. Ajo ka shtuar se e njëjta gjë do të konfirmohet në fund të ditës së sotme, kur t’i japë besim Qeverisë së re, ndërsa emrat e propozuar për kabinetin qeveritar janë njerëz me përvojë të gjerë, të cilët kanë kapacitete profesionale dhe portofol të pasur.

Deputetja Daniela Hristova nga VMRO-DPMNE, në fjalën e saj ka akuzuar LSDM-në dhe BDI-në, se kuadrot e pushtetit dëshmohen vetëm për korrupsionin, jo-profesionalizmin dhe paaftësinë e tyre dhe siç tha ajo, një gjë e tillë ende nuk mund të tregohet në një dritë tjetër.

 

Shpërfaqet gjuha e urrejtjes ndaj gjuhës shqipe

Gjatë seancës plenare sërish u shpërfaq urrejtja ndaj gjuhës shqipe, kryetari i të Majtës, Dimitar Apasiev i kërkoi Ish-ministrit të Arsimit, Arbër Adem që t’i flasë në gjuhën maqedonase nëse ai do të hyjë në debat me të.

“Nëse dëshironi të hyni në një diskutim material dhe të debatoni me mua, ju lutemi flisni në gjuhën maqedonase, sepse nuk përdor kufje kur më drejtohen drejtpërdrejt”, ka thënë Apasiev.

Kryetari i të Majtës, Dimitar Apasiev

Kjo nuk është hera e parë që Apasiev shprehet kundër gjuhës shqipe, si gjuhë zyrtare në Kuvend.

Ai më parë ka kundërshtuar materialet dhe dokumentet e Kuvendit edhe në gjuhën shqipe.

 

Përbërja e kabinetit qeveritarë

I nominuari për kryeministër të Maqedonisë së Veriut, Dimitar Kovaçevski ka propozuar edhe kabinetin e tij qeveritar.

Ai për zëvendëskryeministër për Luftimin e Korrupsionit është propozuar Slavica Grkovska që është udhëhequr deri më tani nga Ljupço Nikolovski. Grkovska ishte deputete e LSDM-së nga viti 2008 deri më 2011.

I propozuari për ministër të ri të Drejtësisë, është propozuar profesori i Fakultetit Juridik, Nikolla Tupancevski në vend të Bojan Mariçiçit.

Dimitar Kovaçevski

Profesori Tupancevski është një staf jopartiak, i cili ka punuar shumë vite si profesor dhe ekspert në fushën e së drejtës penale.

Për ministër të Punëve të Jashtme, Bujar Osmani, ndërsa për zëvendëskryeministër për Çështje ekonomike, Fatmir Bytyqi.

Ministër i Financave, Fatmir Besimi, për ministër i Sistemit Politik dhe njiherit zëvendëskryeministër, Artan Grubi.

Për Ministër i Shëndetësisë, Bekim Sali, për ministër të Arsimit dhe Shkencës është nominuar, Jeton Shaqiri.

Për ministër të ekologjisë, Naser Nuredini, kurse për ministër të Shoqërisë Informatike dhe Administratës, Admirim Haliti.

Sllavjanka Petrovska, e cila ishte zëvendësministre e Punëve të Brendshme në Qeverinë teknike, është propozuar të zëvendësojë Radmilla Shekerinskën në Ministrinë e Mbrojtjes.

Jovana Trençevska, drejtoresha aktuale e Inspektoratit Shtetëror të Punës, është propozuar për ministre në Ministrinë e Punës dhe Politikës Sociale.

Deputetja dhe nënkryetarja e LSDM-së, Bisera Kostadinova-Stojçevska, është propozuar për ministre të re të Kulturës.

Nuk ka ndryshime të mëdha në qeverinë e re nga radhët e ministrave të BDI-së. Vetëm ata heqin dorë nga ministria e shoqërisë së informacionit dhe administratës dhe marrin ministrinë e arsimit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore