Kuvendi i Berishës shkarkon Bashën/ Berisha: Revolucionin nuk e ndal askush

Me 4 mijë e 446 vota pro është shkarkuar nga delegatët kryetari i Partisë Demokratike, Lulzim Basha.

Kjo u konfirmua nga kryetari i komisionit të përkohshëm i Kuvendit Kombëtar të PD-së – i thirrur nga ish-lideri Sali Berisha për shkarkimin e Bashës – Belind Këlliçi.

Ky i fundit bëri të ditur se sekretariati teknik ka mbledhur të gjithë procesverbalin ku ka rezultuar se pjesëmarrës në Kuvendin e Berishës ishin 4 mijë 491 delegatë.

Nga këto kundër kanë votuar 36 delegatë dhe nëntë fletë të tjera kanë rezultuar të pavlefshme.

Fjala e fundit për shkarkimin e Bashës, sipas Këlliçit, do të jepet të shtunën e 18 dhjetorit me një referendum në degët e PD-së nga çdo anëtar i kësaj partie me pyetjen: “A jeni dakord me vendimin e Kuvendit Kombëtar për shkarkimin e Lulzim Basha?”.

Në përfundim Këlliçi tha se ky komision i përkohshëm do të qëndrojë në fuqi deri më 22 mars të vitit 2022.

Berisha në fjalën e tij fill pas këtij rezultati deklaroi se, “askush nuk e ndal revolucionin”.

“Dua të përshëndes sot demokratët dhe qytetarët shqiptarë për këtë ngjarje, më e veçanta, më e jashtëzakonshmja në historinë e lirisë së shqiptarëve”.

Më tej ish-kryeministri theksoi se, “ky Kuvend ishte një vepër e anëtarëve të lirë të PD-së dhe i pari i këtij lloji në Evropë dhe në botë”.

“Ky është Kuvendi i parë që zhvillohet në një arenë sportive futbolli. Sot u zhvillua ndeshja mes lirisë dhe të ardhmes”, e mbylli fjalën e tij Berisha.

Më herët delegatët vendosën edhe shkarkimin e sekretarit të përgjithshëm të PD-së, Gazment Bardhi si edhe të tre nënkryetarëve, Grida Duma, Jorida Tabaku dhe Enkelejd Alibeaj.

Po ashtu ata miratuan në parim statutin e ri të PD-së. Nga ana tjetër u anulua edhe Kuvendi Kombëtar i thirrur nga Basha më 18 dhjetor.

“Përçarja” e demokratëve filloi pas vendimit të Bashës për përjashtimin e Berishës nga Grupi Parlamentar i PD-së.

Ky vendim i kryedemokratit erdhi pasi Departamenti Amerikan i Shtetit e shpalli Berishën dhe familjen e tij si persona non-grata.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.