“Kuvendi Gjithëserb” – konkretizim i “Botës Serbe”, dëshmi që Serbia s’po jeton në shekullin e 21-të

Deklarata 49 pikësh e miratuar më 8 qershor në “Kuvendin Gjithëserb” – një takim i përbashkët i Qeverive të Serbisë dhe Republikës Sprska në Bosnje Hercegovinë – nuk është asgjë tjetër përveç konkretizimit të “Botës Serbe” – gravitimi brenda një sfere të vetme politike i të gjithë serbëve kudo që jetojnë – thonë analistët politikë.

“Kuvendi Gjthëserb” brenda peizazhit të Ballkanit Perëndimor, peizazh ky ditë e më shumë i rënduar nga krizat të cilat peshën e tërheqjes e kanë nga Serbia, për analistin politik, Afrim Kasolli, tregon se si “strukturat politike të kësaj shoqërie janë ende peng të një grandomanie nacionaliste”.

Ndërsa analizohet përmbajtja e deklaratës në fjalë, ku pikat 11 – 14 dedikohen Kosovës, e cila konsiderohet “si pjesë e patjetërsueshme e Serbisë”, në vlerësimin e Kasollit mund të konstatohet se Beogradi zyrtar vazhdon të konsiderojë modelin e nacionalizmit të saj protofashist si model edhe në shekullin 21.

“Pra këtu nuk është fjala për një nacionalizëm qytetar dhe kushtetues në kuptimin modern dhe demokratik të fjalës, por atë model që ka shërbyer si indoktrinim ideologjik i politikës serbe prej ‘mitit deri te gjenocidi’ e të bekuar nga Kisha Ortodokse Serbe”, thotë Kasolli për Albanian Post.

Në të ashtuquajturin “Kuvend Gjithëserb” morën pjesë edhe pjesëtarë të Kishës Ortodokse Serbe dhe të partisë më të madhe të serbëve në Kosovë, Lista Serbe, por edhe serbë tjerë të rajonit.

Për Kasollin “Kuvendi Gjithëserb” – i cili bëri thirrje për unitet të serbëve dhe për mbrojtje të interesave të tyre – po dëshmon se politika serbe “nuk e ka në plan të distancohet nga projekti i ‘Botës Serbe’ që ishte përgjegjës për tragjeditë e shkaktuara ndaj popujve të tjerë në ish-Federatën Jugosllave”.

“Vetëm koha kur u aprovua kjo deklaratë e shpreh qartë këtë tendencë revanshiste të Serbisë. Dhe atë jo vetëm kundër vendeve fqinje, por edhe ndaj atyre që kërkojnë përkujtim të gjenocidit që kjo politikë e kishte shkaktuar në të kaluarën”, shton ai.

Me “Kuvendin Gjithëserb”, sipas Kasollit, po injorohet edhe thirrja e Rezolutës së Organizatës së Kombeve të Bashkuara që e shpalli 11 korrikun “Ditë Ndërkombëtare të Përkujtimit të Viktimave të Gjenocidit në Srebrenicë”.

Ndërkaq për publicistin dhe filozofin, Shkelzen Maliqi, deklarata e “Kuvendit Gjithëserb” nuk ka asgjë të re brenda, meqë të gjitha pikat e saj janë përsëritje të synimeve të mëparshme të parealizuara, ose të dështuara të Serbisë.

“Ato pikat tingëllojnë si listë dëshirash brenda një varianti që si retorikë duket me reziqe, por që objektivisht është reduktuar në atë të Serbisë së Madhe të zbutur e cila shitet nën firmën e Botës Serbe”, vlerëson ai për Albanian Post.

Maliqi ndërsa citon analistët serioz në Serbi, potencon se ky Kuvend në sytë e tyre shihet si një blof populist i radhës i Vuçiç-it.

“Gjuha e përdorur është nacionaliste, zotimet e njejta, thuhet se ‘Kosova është dhe do të mbetet pjesë e Serbisë’, etj., por nuk është program real dhe akcionalë. Kur e arsyetojnë dhe propagandojnë, thonë kështu: ‘Kemi pritur 500 vjet nën Osmanët me e rimarrë Kosovën e Car Dushanit, do të presim edhe 500 vjet tjera”, e këso budallaki”, shton ai.

Se deklarata e miratuar në “Kuvendin Gjithëserb” është programi i nacionalizmit serb për shekullin 21 dhe se e njëjta është shkruar në gjuhën e vjetër të nacionalizmit serb, e thotë edhe profesori i filozofisë, Blerim Latifi.

“Një program i cili shpërfaq gjendjen e një kombi që ecë përpara, ndërsa shikimin e ka të ngulitur fort në të shkuarën. Aty, p.sh., gjendet mesjeta, shekulli 19, shekulli 20, por jo shekulli në të cilin po jetojmë”, ka shkruar Latifi në platformën sociale, Facebook.

Kjo deklaratë, në vlerësimin e tij, është paralajmërim i fqinjëve se Serbia “nuk e ka ndërmend të heqë dorë prej revanshizmit historik ndaj tyre”.

“Një program farsë, i cili nëse injorohet si ata të mëparshmit, premton të kthehet në tragjedi”, shton ai.

Gjatë “Kuvendit Gjithëserb” të 8 qershorit u theksua që ai i mbështet përpjekjet e Republikës së Serbisë “për ruajtjen e integritetit territorial dhe sovranitetit, të garantuar me ligjin ndërkombëtar, Rezolutën 1244 dhe rezolutat e tjera të Këshillit të Sigurimit të Kombeve të Bashkuara”.

Në deklaratë thuhej, mes tjerash, se serbët në Kosovë, si dhe të gjithë qytetarët tjerë që janë besnikë të Serbisë, duhet t’i mbrojnë manastiret, kishat, pronat private, varrezat dhe objektet tjera të rrezikuara.

Shtetet e Bashkuara të Amerikës i shqetësoi ky organizim, i cili nga Rusia u përshëndet.

Ambasadori i Shteteve të Bashkuara të Amerikës në Kosovë, Jeffrey Hovenier, tha se SHBA-ja dhe partnerët e saj perëndimorë nuk pajtohen me Deklaratën e miratuar më 8 qershor nga Serbia dhe entiteti serb i Bosnje e Hercegovinës, Republika Sëpska.

“Nuk e kam pasur mundësinë t’i lexoj të gjitha raportet lidhur me ‘Kuvendin Gjithëserb’, por e kuptoj që aty përdoret gjuhë që thotë se Kosova është pjesë integrale e Serbisë. E kuptoj që ky është qëndrimi i tyre, por ky nuk është qëndrimi i asnjërit prej nesh, nuk është i SHBA-së, i partnerëve tanë të QUINT-it apo kujtdo tjetër”, tha Hovenier.

Për “Kuvendin Gjithëserb”, reagoi edhe kryesuesi i Presidencës së Bosnje e Hercegovinës, Denis Beqiroviç, i cili këtë projekt e cilësoi si “projekt i rrezikshëm” i Vuçiç-it, i cili lidhet drejtpërdrejt “me përpjekjet e Rusisë për të destabilizuar Evropën Juglindore dhe për të larguar vëmendjen nga agresioni i saj në Ukrainë”.

“Një skenar i tillë i përshtatet vetëm Rusisë së [Vladimir] Putinit dhe për këtë arsye nuk është rastësi që zyrtarët më të lartë rusë e kanë përkrahur publikisht mbajtjen e ‘Kuvendit Gjithëserb’”, tha Beqiroviç.

Ai shtoi se organizimi i një kuvendi tërësisht serb është në kundërshtim me praktikat e një bote demokratike dhe të civilizuar – e cila respekton ligjin ndërkombëtar – dhe paraqet “një hap jashtëzakonisht të rrezikshëm”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.