Ministrja e Arsimit, Evis Kushi, në fjalën e saj nga foltorja e Kuvendit, ka paraqitur reformat për arsimin në katër vitet e ardhshme.
Ajo ka theksuar se do të ketë risi në sistemin arsimor, sa i përket programit të sporteve, arteve, zhvillimit të kompetencës digjitale dhe futjes së gjuhës angleze që nga klasa e parë.
Gjithashtu, ministrja ka theksuar se reformat në arsimin parauniversitar para gjashtë vitesh nuk i kanë dhënë ende rezultatet e pritshme.
“Për shkak se shumë studentë largohen jashtë vendit pas gjimnazit, ne kemi vendosur që një nga mekanizmat tonë do të jetë bashkëpunimi i ngushtë me universitetet më prestigjoze në botë”, theksoi ajo.
“Kemi nisur iniciativat, kemi zhvilluar takime me drejtuesit e universiteteve në Vjenë. Po kështu, iniciativa të ngjashme në universitete italiane”.
Do të ketë projekte të përbashkëta, shkëmbime pedagogesh dhe bashkëpunime me tregun e punës.
“Jemi të vendosur që, shumë shpejt, në arsimin e lartë të kemi ende më shumë arritje me reformat”, përmbylli Kushi.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com