Kush po kryeson në garën për kuvende komunale në Kosovë?

Ani pse nuk fitoi asnjë komunë pa balotazh, Lëvizja Vetëvendosje po kryeson në garën për kuvende komunale në nivel vendi.

Bazuar në të dhënat e publikuara nga Eugen Cakolli – nga Instituti Demokratik i Kosovës (KDI), VV është e para me 22,5 për qind të votave për asamble komunale.

Pavarësisht kësaj, Cakolli përmes një postimi në llogarinë e tij në Facebook ka thënë se “nëse merren votat për kuvendet komunale, që përfaqësojnë votën popullore në nivel vendi, atëherë shihet se rezultati mes subjekteve politike është tejet i ngushtë”.

Pas LVV-së, në rend të dytë renditet Lidhja Demokratike e Kosovës.

“Lëvizja Vetëvendosje është subjekti i parë në nivel vendi me 22.5%, pasuar nga LDK me vetëm 0.03% më pak”, shtoi ai.

Ndërkaq në top treshen e kësaj liste bën pjesë edhe Partia Demokratike e Kosovës, me 22 për qind.

Pas tyre radhiten Aleanca për Ardhmërinë e Kosovës me 11,9 për qind, Lista Serbe me 7,6 për qind, NISMA me 2,5 për qind, Aleanca Kosova e Re me 1,2 për qind dhe subjektet tjera me 9,7 për qind.

Ndërkohë, sipas rezultateve të Komisionit Qendror të Zgjedhjeve, në komunën e Prishtinës LVV ka 34.22 për qind, duke e lënë pas LDK-në me 26.57 për qind, dhe PDK-në me 18.40 për qind.

Edhe në komunën e Prizrenit, LVV-ja ka numrin më të lartë të votave për asamble komunale, ku në total ka 28.59 për qind.

Pas saj është renditur PDK me 25.83 për qind, kurse si e treta është renditur LDK me 15.71 për qind.

Megjithatë, LVV nuk ka arritur të renditet si e para edhe në komunën e Pejës.

Nga të dhënat e KQZ-së të publikuara në web faqe, LDK në komunën e Pejës ka arritur të marrë numrin më të madh të votave për kuvend komunal, ku në total ka 43.37 për qind.

Pas LDK-së në këtë komunë si e dyta renditet Aleanca për Ardhmërinë e Kosovës, me 18.86 për qind. Kurse LVV ka marrë vetëm 18.75 për qind.

AAK është renditur si e para parti në komunën e Gjakovës, ku mori 30.20 për qind, duke lënë pas LVV-në me 28.62 për qind. Ndërsa, 12.89 për qind arriti t’i marrë PDK.

Në komunën e Mitrovicës së Jugut, PDK ka arritur 39.79 për qind të votave për kuvend komunal, 30.59 për qind LVV ndërsa 16.41 LDK-ja.

LDK në komunën e Gjilanit ka dalë si subjekti i parë me numrin më të madh të votave për asamble komunale, ku mori 39.31 për qind të votave.

LVV renditet si e dyta me 28.97 për qind ndërsa PDK me 13.39 për qind.

Një ndër shtatë komunat më të mëdha në Kosovë është edhe Ferizaj, ku PDK arriti të grumbullojë 42.79 për qind të votave, duke u pasuar nga LVV me 21.68 për qind, dhe në rend të tretë LDK me 11.44 për qind.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.