Kusari-Lila: S’ka kërkesë zyrtare për shpërndarje të Kuvendit

Shefja e Grupit Parlamentar të Lëvizjes Vetëvendosje, Mimoza Kusari-Lila, pas mbledhjes së kryesisë ka deklaruar se akoma s’ka kërkesë zyrtare për shpërndarja të Kuvendit.

Kusari-Lila, para gazetarëve ka thënë se në rast se ka një “opozitë të bashkaur”, do ta trajtojnë me seriozitetin më të lartë dhe do të deklarohen për datën në të cilën do të bëhet shpërndarja e Kuvendit.

“Kërkesë zyrtare për shpërndarje e Kuvendit nuk ka. Është vetëm kërkesa për debatin për tri vjet qeverisje e cila pritet të trajtohet të premten ajo është propozim nga grupi i Aleancës për Ardhmërinë e Kosovës, të cilët kanë propozuar edhe rrëzimin e Qeverisë për të cilën ne kemi deklaruar se nuk e mbështesim”.

Teksa ka shtuar se “seancë do të ketë edhe të enjten edhe të premtën”.

Ajo tutje ka ripërsëritur se si pozitë kanë gatishmëri për zgjedhje.

“Jemi deklaruar si pozitë, që në rast se ka një unitet mes grupeve parlamentare ne i mbështesim asnjëherë s’kemi thënë se kemi frikë nga zgjedhjet. Megjithatë, s’mund ta bëjmë këtë vetëm me njërin grup parlamentar të opozitës”.

Aleanca për Ardhmërinë e Kosovës (AAK) dhe Lidhja Demokratike e Kosovës (LDK), javën e kaluar kishin refuzuar ftesën e Kurtit për t’u takuar të hënën, i vetmi që ka pranuar ftesën e Kurtit ka qenë kryetari i PDK-së, Memli Krasniqi.

Nga këto dy parti është thënë se refuzimi është bërë për shkak se e kanë konsideruar “shumë të vonuar” ftesën e kryeministrit nën argumentin se pushteti e ka shuar frymën e bashkëpunimit.

Partitë politike veçse kanë nisur të mobilizohen për shkak të mundësisë së zgjedhjeve të reja pak para përfundimit të mandatit të qeverisë së drejtuar nga Lëvizja Vetëvendosje (LVV).

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.