Lajme

Kurz: Dialogu Kosovë-Serbi s’është bërë më i lehtë pas zgjedhjeve në Prishtinë


Sebastian Kurz, Kancelari i Austrisë

Kancelari i Austrisë, Sebastian Kurz, e ka komentuar dialogun Kosovë – Serbi duke e vlerësuar këtë proces si jo të lehtë edhe pse në Kosovë është zgjedhur një qeveri e re.

“Dialogu, i cili përndryshe është i vështirë, nuk u bë më i lehtë pas zgjedhjeve në Prishtinë”, ka thënë Kurz, raporton agjencia e lajmeve serbe, Tanjug.

Kancelari austriak, ka theksuar se Bashkimi Evropian duhet të bëhet një partnerë i besueshëm për Ballkanin Perëndimor, duke shtuar se ky vit nuk duhet shkuar huq sa i përket çështjes së integrimit evropian të rajonit.

Kurz, vuri në dukje se BE -ja, si dhe Austria, nuk mund të jenë indiferentë ndaj asaj se si po zhvillohet rajoni.

“Është veçanërisht e rëndësishme për Austrinë se si zhvillohet rajoni për shkak të afërsisë së tij gjeografike. Çdo zhvillim negativ ka ndikim të drejtpërdrejtë tek ne. Më pak krim këtu nënkupton siguri më të madhe në vendin tonë, më pak konflikt në rajon do të thotë stabilitet më i mirë në vendin tonë. Më mirë zhvillimi ekonomik këtu do të thotë përfitime dhe për ne, si dhe vende të reja pune në Austri ”, ka theksuar Kurz.

Ai madje ka bërë të ditur se Austria është e lidhur ngushtë me vendet e Ballkanit Perëndimor duke shtuar se  “Integrimi evropian nuk është vetëm një çështje burokratike, por mbi të gjitha një çështje gjeopolitike”

/Albanianpost.com


Lajmet kryesore