Kurti vazhdon me qasjen përçarëse edhe te shqiptarët në Luginë – i bënë pjesë të fushatës edhe paratë e kosovarëve

Pasi ndërhyri në zgjedhje në Shqipëri dhe Maqedoni të Veriut, kryeministri Albin Kurti tash ka vendosur të përfshihet edhe në zgjedhjet lokale në Serbi që priten të mbahen këtë të diele të 2 qershorit, duke e përkrahur në garën për kryetare të Preshevës, këshilltaren e tij Ardita Sinanin dhe Ragmi Mustafin, kandidat për kryetar të Bujanocit, gjithashtu këshilltar i zëvendëskryeministrit Besnik Bislimit.

Madje, kryeministri Kurti do të mbajë një fjalim në një tubim parazgjedhor në amfiteatrin e Fakultetit Juridik në Prishtinë, i cili do të mbahet këtë të mërkurë në orën 18:00 e ku do të jenë prezentë Sinani, Mustafi, por edhe deputeti i vetëm shqiptar i Kuvendit të Serbisë, Shaip Kamberi.

Për gazetarin nga Presheva Jeton Ismaili, animi i Kurtit “nuk do t’i bënte mirë shqiptarëve”, teksa sipas tij, krerët e institucioneve të Kosovës më mirë do bënin sikur të kishin bërë thirrje për pjesëmarrje më masive të shqiptarëve të Luginës në zgjedhje, sidomos tek ata persona që jetojnë apo punojnë përkohësisht në Kosovë.

“Kjo thirrje do duhej të ishte e gjeneralizuar ndërsa votuesit do duhej të ishin të lirë të votonin sipas bindjeve të tyre. Çdo anim në zgjedhjet lokale në Bujanoc dhe Preshevë nuk do t’i bënte mirë shqiptarëve të atjeshëm ndërsa nuk do të ishte as e hijshme për reputacionin e Qeverisë së Kosovës”, tha ai në një bisedë për Albanian Post.

Sipas këndvështrimit të Ismailit, derisa thirrja e Kurtit për zgjedhjet parlamentare në Serbi dhe votimin për Shaip Kamberin si deputet ishte plotësisht me vend për shkak të nivelit përfaqësues të domosdoshëm në parlament, apeli për votimin e njërit apo kandidatit tjetër në nivel lokal nga ana e kryeministrit, ‘’nuk do të ishte e mirë për demokracinë në Luginë’’.

“Mendoj se kryeministri Kurti do duhej angazhuar pas këtyre zgjedhjeve dhe në varësi të rezultateve, të kontribuojë që faktori i këtushëm politik shqiptar të jetë sa më i unifikuar për t’u përballur me sfidat e radhës, sidomos në raport me institucionet qendrore në Serbi”, theksoi ai.

Vec Kurtit direkt, pjesë e fushatës zgjedhore atje janë bërë edhe paratë e taksapaguesve të Kosovës, që qeveria si donacione i dërgon për Luginë.

Tash, partia e këshilltares së Sinanit, PVD-ja, po i përmend paratë që pritet të vijnë nga Kosova nëpër takime me njerëz, duke thënë se ato janë pothuajse të kushtëzuara me fitoren e saj.

Për shembull, Shpëtim Haliti, kryetar i shtabit zgjedhor të PVD-së, partisë së këshilltares së Kurtit, thotë se nëse nuk fiton garën për kryetare Sinani, mjetet e Qeverisë së Kosovës për Preshevën nuk do të derdhen më në këtë komunë.

“Përderisa në pushtetin e kaluar të Preshevës nuk ka ndarë mjete Qeveria e Kosovës, sepse ata e vendosin nuk e vendosim ne, logjikisht që nuk ndanë prapë sepse nuk e ka besimin. E dimë si ka qenë bashkëpunimi me pushtetin e kaluar me Qeverinë e Kosovës, duke e sharë dhe akuzuar Kurtin”, ka potencuar Haliti gjatë një interviste një media lokale në Preshevë.

Në anën tjetër, Shqiprim Arifi, ish kryetari i kësaj komune që u shkarkua gjatë muaj prill, siç tha nga autoritetet në Serbi “në mënyrë arbitrare”, thotë se Kurti ‘’pasi përçau shqiptarët e Maqedonisë së Veriut’’, tani ka filluar të kyçet në fushatën parazgjedhore në Preshevë dhe Bujanoc.

“Kjo është ndërhyre flagrante kundër vullnetit të lirë politik të shqiptareve në Luginë, duke i shantazhuar me buxhetin e Republikës së Kosovës për ta votuar këtë parti. PVD është partia e parë dhe e vetme që ka votuar pro qeverisë së Vuçiç-it dhe ishte partner (jo-koalicionar) në mandatin e deputetit të PVD-së Fatmir Hasani”, potencoi Arifi për AP.

Ndërsa vitin e kaluar, Arifi pati bërë të ditur se Prokuroria Speciale në Kosovë ka filluar hetimet për keqpërdorimin e Fondit të Kosovës përmes Këshillit Kombëtar Shqiptar, të udhëhequr nga organizata, sipas tij, “korruptive”.

“Ju rikujtoj se Kurti prej buxhetit të Republikës së Kosovës ka ndarë rreth 2 milionë euro të cilat kanë shkuar drejtpërdrejtë në xhepat e bashkëpunëtorëve të Sinanit dhe Mustafit”, ka pretenduar Arifi.

Mospajtimet në mes të Arifit dhe Kurtit janë krijuar pasi që ky i fundit i ka dhënë mbështetje vazhdimisht kundërshtarëve politikë të Arifit në Luginë të Preshevës.

Por, ndaj akuzave të Arfiti, deri më tani – asnjëherë – nuk u është përgjigjur kreu i ekzekutivit kosovar Albin Kurti.

Ndryshe, shqiptarët në Serbi janë pakicat e katërt kombëtare, sipas regjistrimit të fundit të popullsisë të vitit 2022. Në këtë shtet jetojnë 61.687 shqiptarë.

Partitë politikë dhe banorët shqiptarë shpesh janë ankuar se autoritetet serbe po e ulin numrin e shqiptarëve që jetojnë në Serbi, përmes pasivizimit të adresave të tyre.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.