Kryeministri i Kosovës, Albin Kurti, të hënë ndërsa ka uruar Ditën Memoriale të komunitetit egjiptian në Kosovë, ka potencuar se në tri vjet qeverisje ky komunitet ka gëzuar mbështetjen e Qeverisë në shumë fusha.
“Gjatë këtyre më shumë se tri vjet qeverisje, mirënjohjen ndaj jush e kemi shprehur me mbështetje institucionale në arsim përmes bursave të studimit e qendrave të mësimit, në mirëqenie përmes punësimit dhe programeve për praktikë në punë, ndërtimit dhe renovimit të shtëpive dhe projekteve infrastrukturore, e në ndërmarrësi përmes granteve për biznese të vogla”, ka shkruar Kurti në platformën sociale, Facebook.
Kjo mbështetje, sipas Kurtit, tregon vetëm fillimin e një angazhimi të qëndrueshëm për unitet.
“Republika jonë është republikë e të gjithëve. Zhvillimi dhe progresi është i qëndrueshëm atëherë kur është i gjithmbarshëm. Në këtë ditë i gëzohemi arritjeve të përbashkëta, rreshtohemi përballë sfidave dhe zotohemi për punë dhe bashkëpunim në përmirësimin e mëtejmë të mirëqenies, pozitës dhe mundësive tuaja në vendin tonë”.