Lajme

Kurti udhëton drejt Austrisë, merr pjesë në Forumin Ekonomik të Vjenës


Kryeministri i Kosovës, Albin Kurti ka udhëtuar për në Austri, ku do të merr pjesë në Forumin Ekonomik të Vjenës.​

Kurti dhe presidentja e Kosovws, Vjosa Osmani, kanë qëndruar në Paris, në Forumin e Paqes, ku janë pritur nga presidenti i Francës, Emmanuel Macron.

Pas takimit me Macron, Kurti pati theksuar se propozimi franko-gjerman për marrëveshje me Serbinë është “bazë e mirë”.

Këtë mendim të tij për draftin e projektuar nga këshilltarët Emmanuel Bonne dhe Jens Plotner, ia ka thënë edhe presidentit francez, Emmanuel Macron, në një takim në Paris, bashkë edhe me presidenten e Kosovës, Vjosa Osmani.

“Potencuam se Kosova ka propozuar kornizën e përgjithshme të marrëveshjes, ndërsa propozimi franko-gjerman shërben si bazë e mirë për diskutime të mëtejshme”, shkruan Kurti t’i ketë kumtuar në takim Macron-it.

“Në takimin e përbashkët me Presidenten Osmani, biseduam për thellimin e marrëdhënieve bilaterale në mes të dy shteteve, dialogun për marrëveshje Kosovë-Serbi, si dhe zhvillimet e fundit”, shkruan në Facebook Kurti.

Ai gjithashtu ka sqaruar se në këtë takim është theksuar edhe se “Republika e Kosovës është partnere e besueshme e Republikës së Francës dhe aleatëve të tjerë euroatlantik”.

“Falënderuam Presidentin Macron për angazhimin e Francës, në bashkëpunim me Gjermaninë, për dinamizimin e procesit të dialogut dhe ritheksuam përkushtimin e plotë të Republikës së Kosovës në këtë proces, të bazuar në ruajtjen e rendit kushtetues, sovranitetit, integritetit territorial e marrëdhënieve të mira fqinjësore”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore