Kryeministri i Kosovës, Albin Kurti, nëpërmjet një video-mesazhi në “Facebook” të dielën, u ka bërë thirrje të rinjve e të rejave nga radhët e komuniteteve joshumicë, posaçërisht komunitetit rom, ashkali e egjiptian, që të aplikojnë në thirrjet e hapura për punësim në institucionet publike.

“Kontributi dhe pjesëmarrja e juaj në jetën institucionale është qenësore për shtetin, republikën, dhe shoqërinë tonë”, deklaroi nëpërmjet një video-mesazhi kreu i ekzekutivit kosovar, “andaj edhe ju bëj ftesë që të aplikoni në thirrjen e hapura për punësimin në institucionet publike të Kosovës”.

“Qeveria e Kosovës bashkë me organizatën ‘Zëri i Romëve, Ashkalinjëve dhe Egjiptianëvë’ e nisi këtë fushatë për t’iu bërë thirrje të gjithë të rejave dhe të rinjëve nga këto komunitete që të përfshihen aktivisht edhe në jetën publike, përveçse atë shoqërore”, shtoi ndër të tjera kryeministri Kurti.

Në bazë të Kushtetutës së Kosovës, romët, ashkalinjtë dhe egjiptianët gëzojnë të drejtat e barabarta me të gjitha komunitetet tjera. Në kuadër të shërbimit civil në institucionet e nivelit qendror, minimum 10 për qind e posteve, duhet të rezervohen për personat të cilët u përkasin komuniteteve të cilët nuk janë shumicë në Kosovë dhe që përmbushin kriteret specifike të punësimit.