Kurti thotë se e pranon Asociacionin, por i ka 6 kushte

Kryeministri i Kosovës, Albin Kurti, ka thënë në Kuvendin e Kosovës se themelimi i Asociacionit të Komunave me Shumicë Serbe është i mundshëm, por ka përmendur 6 parakushte që duhet plotësohen para se të themelohet kjo strukturë e re qeverisëse brenda Kosovës.

Kushti i parë sipas kryeministrit “është që të jetë në përputhje me Kushtetutën e Kosovës dhe ligjet që janë në fuqi”.

Tjetër kusht është që të mos jetë mono-etnik.

“Asociacioni nuk mund të jetë monoetnik duhet të ndërrojë emrin, nuk mund të bartë asnjë pushtet publik apo ekzekutiv dhe duhet t’i shërbejë vetëm bashkëpunimit horizontal të komunave, sipas Kushtetutës dhe Ligjit për vetëqeverisje lokale kreu pesë”.

Një kusht tjetër që u prezantua nga Kurti ishte që të shuhen strukturat ilegale të Serbisë në Kosovë dhe të bëhet dorëzimi i armëve ilegale.

Gjithashtu, pohoi se si kusht është që “të drejtat e pakicave kombëtare dhe mekanizmat mbrojtës përkatës duhet të ngërthejnë parimin e reciprocitetit ndërmjet dy shteteve respektive dhe të marrin parasysh standardet dhe modelet evropiane”.

“Pesë, Asociacioni është pjesë e marrëveshjes finale dhe zbatohet pas njohjes reciproke dhe vetëm pasi Serbia t’i ketë pranuar parimet e kartës së organizatës së Kombeve të Bashkuara në raportet e saj ndërshtetërore me Republikën e Kosovës”.

Ai tutje ka thënë se kushti tjetër është që Vuçiç të tërheqë letrat e dërguar për mos pranimin e Kosovës.

“Dhe gjashtë, presidenti i Serbisë i tërheqë letrat e dërguara te pesë shtetet anëtare të BE-së dhe tek të tjerat për mospranimin e aplikimit të Republikës së Kosovës për anëtarësim në Bashkimin Evropian që paraqet edhe shkelje të po asaj marrëveshje Thaçi- Daçiç të 19 prillit 2018”.

Por, sipas kryetarit të Lidhjes Demokratike të Kosovës, Lumir Abdixhiku, krejt çfarë duhet të vihet re në fjalimin e Kurtit është që “2 shkurti të mbahet mend si data e pranimit të Asociacionit të Komunave me Shumicë Serbe në Kosovë nga kryeministri, Albin Kurti”.

“Kjo datë e 2 shkurtit është data e pranimit të Asociacionit nga kryeministri Kurti. Kurti tha që marrëveshja e vitit 2013 është e bëshme me disa kushte”.

“Jo gjashtë, por 22 udhëzime i ke nga Gjykata Kushtetuese. Të gjitha i ke me një vend, thonë respektim i rendit, Kushtetutës së Kosovës”, tha Abdixhiku.

Kreu i LDK-së e kritikoi kryeministrin edhe për mostransparencë.

“Kryeministri Kurti ka pasur dialog me presidentin e Serbisë, dhe asnjëherë s’ka ardhur në kuvend që të flas me deputetet shqiptarë dhe jo shqiptar të Kosovës”.

Kurss, kryetari i Grupit Parlamentar të Partisë Demokratike të Kosovës, Ableard Tahiri tha se nuk e din “se a është rastësi apo sinkronizim mes Kurtit dhe Vuçiçit që në kohën kur në Kuvendin e Serbisë po diskutohet për dialogun, kryeministri kosovar e jep lajmin për themelimin e Asociacionit”.

“Ajo që është e rëndësishme është ndryshimi radikal, drastik, që është ndryshim jashtëzakonisht i madh i diskursit të Kurtit”, tha Tahiri.

Kundërpërgjigje kishte nga kryeministri i Kosovës, i cili deklaroi se Zajdenica ishte pranuar nga partitë të cilat ishin në pushtet në vitin 2013 dhe në vitin 2015.

“Zajdenica nuk kalon se Zajdenicën e keni pranuar ju në vitin 2013 dhe në vitin 2015. Por ajo nuk bëhet. Ju nuk e keni zbatuar, unë nuk jua zbatoj. Sa i përket raportimit në Kuvendin e Kosovës ju kam thënë me dyer të hapura ose të mbyllura mund ta diskutojmë kurdo që ju doni”.

Marrëveshja për formimin e këtij Asociacioni është arritur në vitin 2013 në kuadër të dialogut për normalizimin e marrëdhënieve Kosovë-Serbi, të ndërmjetësuar nga Bashkimi Evropian, por ajo nuk është zbatuar kurrë.

Gjykata Kushtetuese e Kosovës ka konstatuar më 23 dhjetor të vitit 2015 se parimet e përgjithshme të Asociacionit, të dakorduara po atë vit mes Kosovës dhe Serbisë, nuk janë tërësisht në përputhje me frymën e Kushtetutës së Kosovës.

Serbia, në anë tjetër, këmbëngul që Asociacioni të formohet në bazë të marrëveshjeve të arritura.

Shtetet e Bashkuara dhe Bashkimi Evropian kanë kërkuar vazhdimisht nga palët që t’i respektojnë të gjitha marrëveshjet e arritura, përfshirë atë për Asociacionin.

Artikulimi i fundi i kësaj kërkese u shpreh përmes një letre të hapur të dy top-diplomatëve amerikanë, Derek Chollet dhe Gabriel Escobar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.