Kryeministri i Kosovës, Albin Kurti, në një intervistë për RTK2, tha se nuk e sheh të nevojshëm themelimin e Asociacionit të komunave me shumicë serbe dhe se nuk ka parë akoma ndonjë argument të fortë për themelimin e këtij mekanizmi.
Një ditë pasi njoftoi që s’do të marrë pjesë në takimin e 31 janarit të organizuar nga Ambasada amerikane në Prishtinë sepse nuk ishte ftuar të diskutonte detajet e Asociacionit të komunave me shumicë serbe, ritheksoi qëndrimin e tij lidhur me një prej çështjeve më problematike për Kosovën.
“Jam gati për bisedime për të drejtat e pakicave, të komuniteteve joshumicë, jam gati për këtë. Por duhet ta kuptoni se është shumë e rëndësishme që ata që duan më shumë të drejta sesa u jep plani i Ahtisaarit, e mbajnë barrën e argumentimit – pse u duhen më shumë”.
“Ahtisaari mori çmimin Nobel për Paqe, çfarë do ta plotësonte planin e Ahtisaarit, cilat janë argumentet për të metat e tij. Barra e argumentit duhet të jetë mbi ata që kërkojnë diçka tjetër apo diçka më shumë”, tha Kurti.
Ndërkaq, kreu i ekzekutivit ka treguar propozimin e Bashkimit Evropian për normalizimin e marrëdhënieve ndërjmet Kosovës dhe Serbisë e ka parë në shtator nga “iPad-i” i emisarit special të BE-së për dialogun, Miroslav Lajçak dhe që nga atëherë kanë negociuar për arritjen e marrëveshjes.
“Të jem plotësisht i qartë, sigurisht edhe i sinqertë, më 9 shtator e kam lexuar atë propozim, por nga ‘iPad’-i i Lajçakut, nuk kam pasur dokument me shkrim. Ishin së bashku me Jens Plotner dhe Emmanuel Bonn, të dërguarit nga Parisi dhe Berlini. Unë menjëherë e kam vërejtur se më në fund kemi një propozim për marrëveshje”, shtoi ai.
Kur ka folur për kthimin e serbëve në institucione, numri një i qeverisë tha se ndjen keqardhje që ata janë larguar nga pozitat e tyre të punës dhe se nuk dëshiron që serbët në veri të zëvendësohen me shqiptarë.
“Më vjen shumë keq që ata kanë dhënë dorëheqje. Mendoj se dorëheqjet janë të gabuara. Unë në parim nuk përjashtoj askënd për t’u kthyer, por nuk jam kompetentë që të vendosi për kriteret në vend të komisionit profesional. E them qartë, nuk kam ndërmend ta mbush atë vakum me shqiptarë. Nëse serbët kanë dhënë dorëheqje, serbët duhet të jenë në ato pozita”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
