Kurti po vazhdon t’i shmanget Kuvendit, s’po përgjigjet pyetjeve parlamentare – thotë Kryeziu

Drejtori ekzekutiv i Institutit Demokratik të Kosovës, Ismet Kryeziu, nëpërmjet një postimi në platformën sociale, Facebook, ka potencuar se kryeministri i Kosovës, Albin Kurti, po vazhdon t’i shmanget “llogaridhënies ndaj Kuvendit duke mos marrë pjesë në seancë”.

“Sot kur po mbahet seanca e parë e Kuvendit për sesionin vjeshtor 2024 ai nuk morri pjesë e as nuk u përgjigj në pyetjet parlamentare, njëjtë si në sesionin pranveror kur nuk u përgjigj në asnjë nga 36 pyetjet që deputetët kishin parashtruar për të”, tha ai.

Kryeziu ka kritikuar edhe opozitën parlamentare, meqë në vlerësimin e tij, ajo nuk morri mundin që asnjëherë gjatë sesionit pranveror të thërrasë kryeministrin në interpelancë.

“Pyetjet parlamentare dhe interpelanca janë një instrument parlamentar e demokratik për të mbajtur qeverinë përgjegjëse e llogaridhënëse si dhe për të siguruar transparencë në vendimet dhe zbatimin e politikave”.

Ndryshe seanca e sotme parlamentare ka dështuar për shkak të mungesës së deputetëve.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.