Kurti: Për të shkuar në zgjedhje banditët që shkaktuan dhunë në Veri duhet të kthehen në Serbi ose të arrestohen në Kosovë

Kryeministri i Kosovës, Albin Kurti, në një intervistë për NBC NEWS, ka paralajmëruar zgjedhje në Veri, por kjo, sipas tij, do të ndodhë me kusht që fillimisht banditët që shkaktuan dhunë në protesta të kthehen në Serbi ose të arrestohen në Kosovë.

“Duhet të jemi të sigurt që të zbatohet marrëveshja e Brukselit e cila e ka njohjen de-facto, për shtensionim këta banditë, këta ekstremistë të kthehen në Serbi ose të arrestohen në Kosovë dhe pastaj zgjedhje të hershme”.

“Këta kryetarë kanë legjitimet të vogël, por janë të vetmit të ligjshëm. Para se të kemi zgjedhje të hershme, duhet të kemi sundimin e ligjit në vend, që këta banditë, ekstremistë të dhunshëm që u paraqitën të jenë para ligjit dhe më pas të ketë kushte dhe fushatë të hapur për zgjedhje demokratike”, ka deklaruar Kurti.

Kryeministri, gjatë kësaj interviste konfirmoi edhe takimin javën e ardhshme me Escobarin dhe Lajçak.

“BE-ja të jetë aktive në këtë dialog. Javën tjetër, Lajçak dhe Escobar do të vijnë në Kosovë dhe do të diskutojmë detajet. Besoj në zgjedhjet e hershme, por fillimisht kemi nevojë për sundim të ligjit dhe fushatë fer para zgjedhjeve”, ka thënë Kurti.

Ndër të tjera, ai përsëriti se ajo çfarë kishin bërë ka qenë vetëm “plotësimi i ligjit” dhe “respektimi i të drejtave të njeriut”.

“Plotësia e ligjit, respektimi i të drejtave të njeriut, respekti për kryetarët e komunave që u zgjodhën dhe ata që duhej të shkonin në zyrat e tyre që kanë qenë shumë të shqetësuar se mund të destabilizohet situata”.

Ai pati thirrje që komuniteti ndërkombëtarë të ndihmojë që serbët në Kosovë të jenë të lirshëm të ushtrojnë të drejtat e tyre.

“Njerëzit duan të dëgjohen, por Beogradi zyrtar nuk i lejon. Beogradi lejon vetëm një parti, Listën Serbe. Nuk ka demokraci pa pluralizëm politik. Komuniteti ndërkombëtar duhet të na ndihmojë që ata të jenë të lirshëm ta ushtrojnë të drejtën e tyre në votime ”, ka shtuar Kurti.

Sipas tij, të gjitha thirrjet e botës demokratike perëndimore kishin ardhur për shkak të shqetësimit të tyre se presidenti serb Aleksandar Vuçiç mund ta destabilizonte rajonin.

“Papritmas ka pasur shumë shqetësime në botën demokratike perëndimore pasi presidenti serb mund ta destabilizojë jo vetëm Kosovën, por edhe rajonin”, deklaroi Kurti.

Teksa ka shtuar se nuk ka fakte që Policia e Kosovës ka përdorur dhunë gjatë trazirave të fundit në veri.

“Nuk ka evidencë që Policia e Kosovës përdori dhunë. Policia e Kosovës është më profesionalja në Ballkan, ka qenë e trajnuar nga SHBA-ja, UK, dhe BE-ja”.

“Në anën tjetër, kemi banditët që janë aty për destabilizuar Kosovën”.

Ndryshe, edhe presidentja e Kosovës, Vjosa Osmani, ka paralajmëruar zgjedhje të reja në Veri pas tensionimit të situatës tash e 6 ditë në Veri, ku po mbahet protesta nga serbët lokal.

Osmani të enjten zhvilloi një takim me kancelarin gjerman Olaf Scholz dhe presidentin francez Emmanuel Macron në margjinat e samitit të dytë të Komunitet Politik, ku është diskutuar ekskluzivisht për zhvillimet e fundit politike dhe të sigurisë në pjesën veriore të Kosovës.

Komuniteti ndërkombëtar ka paralajmëruar pasoja për Kosovën, pas përplasjes së serbëve të veriut me policinë, e cila të premten, me vendim të kryeministrit Albin Kurti realizoi aksionin për t’ua mundësuar qasjen në zyra kryetarëve të rinj të tri komunave veriore – Leposaviq, Zubin Potok dhe Zveçan.

Shtetet e Bashkuara të Amerikës dhe vendet tjera partenre të QUINT-it (Gjermania, Franca, Italia dhe Britania e Madhe), e kanë bërë fajtore Qeverinë e Kosovës dhe kryeministrin Kurti për tensionimin e situatës në veriun e vendit të banuar me serbë etnikë.

Aktualisht, në veri ekziston pak ose aspak rendi publik, udhëheqja nuk gëzon as autoritet, as besnikëri, ndërsa bandat e dirigjuara nga Beogradi i kërcënojnë me rezistencë institucionet kosovare që po mundohen të integrojnë komunitetin serb dhe të vendosin një rend efektiv.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.