Lajme

Kurti për herë të dytë brenda një muaji udhëton për në Mbretëri të Bashkuar


Kryeministri i Kosovës, Albin Kurti.

Kryeministri i Kosovës, Albin Kurti, të premten ka udhëtuar për në Londër të Mbretërisë së Bashkuar, kjo është vizita e dytë e kreut ekzekutiv brenda muajit shkurt për në këtë shtet.

Lajmin e ka bërë të ditur Zyra e Kryeministrit përmes një komunikate dërguar mediave.

“Ai, së bashku me ministrin e Financave, Punës dhe Transfereve, Hekuran Murati, do të marrë pjesë në Samitin për Investime në Ballkanin Perëndimor 2024 të organizuar nga Banka Evropiane për Rindërtim dhe Zhvillim”, thuhet në komunikatë.

Edhe më 12 shkurt, Kurti, ka udhëtuar për në Mbretëri të Bashkuar, ku do të ketë vizitë zyrtare një ditore.

Po ashtu, më 8 tetor të 2023-ës ai kishte udhëtuar drejt Mbretërisë së Bashkuar ku kishte marrë pjesë në Konferencën vjetore të Partisë Laburiste.

Ndryshe, kjo përbën vizitën e gjashtë të kryeministrit Kurti në Mbretërinë e Bashkuar në më pak se dy vite.

Para kësaj vizite ai kishte takuar Sekretarin në hije të Punëve të Jashtme, David Lammy dhe Ministrin në hije për Evropë, Stephen Doughty – të dy nga radhët e Partisë Laburiste.

Partia Laburiste është partia më e madhe socialiste në Mbretërinë e Bashkuar – opozitë e Partisë Konservatore që aktualisht udhëhiqet nga kryeministri i Mbretërisë së Bashkuar, Rishi Sunak.

Kujtojmë se përkrahja e Partisë Laburiste nuk ka munguar kurrë për Kosovën, posaçërisht në kohën e kryeministrit Tony Blair e deri më sot.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore