Shqipëria

Kurti pas takimeve në Tiranë: Dëshiroja t’i njoftoja me marrëveshjen, Shqipëria gjithmonë pranë Kosovës


Pas takimeve me presidentin, kryeministrin dhe kreun e Kuvendit në Shqipëri, kryeministri i Kosovës Albin Kurti mbajti një deklaratë për mediat.

Sipas tij, në takime u theksuar dy gjëra kryesore.

E para, për të ishte “suksesi dhe progresi demokratik e ekonomik i Kosovës në këto dy vite të qeverisjes tonë, që është një progres i pashembullt në Kosovën e pavarur”.

Dhe e dyta informimi për detajet e përmbajtjes së marrëveshjeve që “kemi realizuar së pari në Bruksel dhe më pas edhe ankesin e zbatimit në Ohër, për normalizimin e marrëdhënieve mes Kosovës dhe Serbisë”.

Kreu i Qeverisë së Kosovës tha se kishte pasur dëshirë që t’i njoftojë për së afërmi, dhe në hollësi me procesin e dialogut, por edhe me elementët përbërës të marrëveshjes që tani duhet të zbatohet.

Kurti ravijëzoi se, krerët e shtetit shqiptar e kanë mbështetur për procesin e dialogut dhe marrëveshjen e arritur, ndërsa tha se Shqipëria është gjithmonë pranë Kosovës dhe këtë e dëshmon si në arenën ndërkombëtare, ashtu edhe në marrëdhëniet bilaterale.

Ai u pyet gjithashtu edhe për “shmangien e Partisë Demokratike nga agjenda e takimeve të tij në Tiranë, pasi ai u takua edhe me kreun e Partisë së Lirisë, Ilir Meta.

Por, Kurti sqaroi se takimi me Metën nuk ka qenë në cilësinë e kryetarit të Partisë së Lirisë, por si ish president i vendit.

Vizita e kryeministrit Kurti në Tiranë

Vizita e kryeministrit Kurti nisi që në mëngjes, kur u takua me presidentin e Republikës, Bajram Begaj.

Të dy udhëheqësit biseduan mbi zhvillimet më të fundit të negociatave mes Kosovës dhe Serbisë.

Kryeqeveritari u prit më pas në kryesinë e Kuvendit nga vetë kryetarja e këtij institucioni, Lindita Nikolla.

Më pas një takim kokë më kokë pati me kryeministrin Rama, i cili kaloi pa asnjë koment për mediat e pranishme.

Rama më pas në Facebook shprehu mbështetjen e tij për kurajon dhe realizmin e homologut të tij Kurti drejt normalizimit të marrëdhënieve me Serbinë.

“Me mikun e posaçëm, kryeministrin e Kosovës, Albin Kurti, gjatë drekës së sotme ku diskutuam me detaje për marrëveshjen e Ohrit dhe ecurinë e mëtejshme të procesit të zbatimit të saj. I shpreha Albinit të gjithë simpatinë time për kurajon dhe realizmin me të cilin ka hedhur hapa me rëndësi të madhe drejt normalizimit të marrëdhënieve me Serbinë”, shkruan fillimisht Rama.

Ai e inkurajoi homologun e tij, sipas njoftimit, në hedhjen e hapave të mëtejshëm, “qoftë për garantimin e komunave serbe në kornizën e asociacionit që garanton vetë-menaxhimin e komunitetit serb, qoftë për funksionimin me garancitë e nevojshme të Kishës Serbe në vendet e saj të kultit në Kosovë”.

“E sigurova se në këtë proces jo të lehtë ai ka mbështetjen time më të plotë”, theksoi Rama.

Kryeministri njoftoi po ashtu se qeveritë e Kosovës dhe Shqipërisë do të kenë mbledhjen e tyre të përbashkët të radhës në muajin qershor.

Marrëveshja

Kosova dhe Serbia u pajtuan më 18 mars, në Ohër, që të fillojnë zbatimin e Marrëveshjes për normalizimin e raporteve sa më shpejt që të jetë e mundur.

Megjithatë, atë nuk e nënshkruan zyrtarisht.

Kryeministri i Kosovës, Albin Kurti dhe presidenti i Serbisë Aleksandër Vuçiç, u pajtuan paraprakisht më 27 shkurt me planin 11-pikësh të Bashkimit Evropian.

Kjo, për normalizimin e marrëdhënieve që për diplomacinë perëndimore vlerësohet shumë e rëndësishme dhe një sukses pas agresionit rus në Ukrainë.

Tani Bashkimi Evropian duhet të gjejë rrugë për t’i bindur palët që ta kuptojnë Marrëveshjen si obligim, dhe t’i implementojnë të gjitha pikat.

Në rastin e Serbisë, mendohet të bëhet përmes përfshirjes së Marrëveshjes në kornizën e negociatave të anëtarësimit në BE, ndërsa për Kosovën në Komisionin për Normalizim.

Kjo marrëveshje nuk e përfshin njohjen reciproke mes të dy vendeve, por kërkon nga të dyja që t’i pranojnë dokumentet dhe simbolet e njëra-tjetrës, përfshirë: pasaportat, diplomat dhe targat e veturave.

Po ashtu, nga palët kërkohet që t’i zbatojnë të gjitha marrëveshjet e arritura deri më tash në dialogun për normalizimin e marrëdhënieve, përfshirë edhe atë për themelimin e Asociacionit të Komunave me shumicë serbe në Kosovë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com

Lajmet kryesore