Albin Kurti, kryeministri i Kosovës, të mërkurën e 17 gushtit, një ditë para takimit me presidentin e Serbisë, Aleksandër Vuçiç, në kuadër të dialogut në Bruksel, do të pritet nga Sekretari i Përgjithshëm i NATO-s, Jens Stoltenberg.
Kështu të paktën ka bërë të ditur përmes një komunikate për media, Aleanca Veri-Atlantike.
Në komunikatën për shtyp e lëshuar nga NATO thuhet se Jens Stoltenberg dhe Albin Kurti pas takimit do të organizojnë një konferencë të përbashkët për shtyp në selinë e NATO-s.
Të njëjtën ditë Stoltenberg do ta pres në takim edhe presidentin serb, Aleksandër Vuçiç Vuçiq.
“Të mërkurën, më 17 gusht 2022, Sekretari i Përgjithshëm i NATO-s, Jens Stoltenberg, do të presë Presidentin e Republikës së Serbisë, Aleksandar Vuçiç. Sekretari i Përgjithshëm dhe Presidenti do të japin një konferencë të përbashkët për shtyp në selinë e NATO-s pas takimit të tyre”, thuhet në komunikatë.
Takimi në fjalë vjen në dritën e zhvillimeve të fundit në Veriun e Kosovës, kur situata në këtë pjesë të vendit u përkeqësua pasi serbët lokal ngritën barrikada duke bllokuar rrugët që të shpien drejtë pikë kalimeve kufitare në Jarinje dhe Bërnjak, për të kundërshtuar kështu vendimin e Qeverisë së Kosovës për konvertimin e targave ilegale dhe reciprocitetit me kartat e identitetit.
Ndonëse barrikadat u larguan dhe kështu u parandalua një ekses i mundshëm në Veriun e Kosovës, Jens Stoltenberg një ditë para depërshkallëzimit të situatës telefonoi Albin Kurti dhe Aleksandër Vuçiç-in për të treguar qëndrimin e NATO-s në këtë rast.
Kreu i NATO-s në komunikim me Vuçiç, u tregua mjaft eksplicit, ai haptazi njoftoi se “NATO është e gatshme të ndërhyjë ushtarakisht në Kosovë në momentin që situata përshkallëzohet përsëri”.
E deklarata e Stoltenberg nga njohësit e çështjeve të sigurisë u lexua si një deklaratë që ka për qëllim të përçojë një mesazh të fortë Serbisë, se NATO është autoritet suprem për sa i përket sigurisë dhe paqes në Kosovë dhe se e njëjta nuk do të tolerojë eskalimin e situatës në rrethanat gjeopolitike në të cilën gjendet globi sot.
Jens Stoltenberg më 26 shtator të vitit të kaluar kishte kërkuar nga kryeministri i Kosovës, Albin Kurti dhe presidenti i Serbisë, Aleksandër Vuçiç, që të ulnin tensionet në Veri të Kosovës, pasi më 20 shtator të po këtij viti Qeveria e Kosovës pati filluar zbatimin e një vendimi ku automjetet nga Serbia që hynin në Kosovë, duhet të largonin targat dhe të përdornin targa të përkohshme të lëshuara nga autoritetet e Kosovës.
Ndonëse një gjë e tillë pati tensionuar situatën dhe për më shumë se 1 javë rrugët që të çonin në pikë kalimet kufitare në Jarinjë dhe Bërnjak kishin mbetur të bllokuara, Stoltenberg nuk pati përmendur për mundësinë e ndërhyrjes së NATO-s.
Mesazhi i tij drejtuar dy liderëve kishte një karakter më neutral dhe i ftonte këta të fundit që problemet e tyre t’i zgjidhnin përmes dialogut.
/Albanianpost.com
