Kurti: Pa të vërtetën e Walkerit për mizoritë e Millosheviçit, historia e Kosovës mund të ishte edhe më e rëndë

Kryeministri i Kosovës, Albin Kurti, nëpërmjet një postimi në platformën “X” të enjten, vlerësoi kontributin e ish-shefit të misionit verifikues të Organizatës për Siguri dhe Bashkëpunim në Evropë (OSBE), William Walker, duke thënë se ai dokumentoi mizoritë e policisë dhe ushtrisë serbe në Kosovë në vitin 1998, kur nga afër pa masakrën e 45 shqiptarëve në fshatin Reçak.

“Ambasadori Walker është ndër miqtë më të mëdhenj që ka vendi ynë. Ai ishte një nga figurat e para ndërkombëtare që vizitoi vendet e masakrave si shef i misionit verifikues të Kosovës, duke dokumentuar mizoritë e ndodhura në Kosovë në vitin 1998”, deklaroi kreu i ekzekutivit kosovar.

“Kur hyri në Reçak, ai pa kufomat e 45 shqiptarëve që ishin vrarë nga forcat serbe në këtë fshat. Ngjarjet në Kosovë kanë ndodhur para epokës së mediave sociale, kështu që pa vullnetin dhe integritetin e njerëzve dhe organizatave si ambasadori Walker dhe OSBE-ja, historia mund të kishte marrë një kthesë edhe më të rëndë”, kujtoi ndër të tjera kryeministri Kurti.

“Ky është krim kundër njerëzimit”, pati deklaruar ambasadori Walker mëngjesin e 16 janarit para gropës së mbushur me kufoma shqiptarësh – varrezë masive që nuk ishte mbyllur qëllimshëm – dhe fjala e tij për pak minuta u bë kryelajm i të gjitha mediave botërore: “Nga ajo që unë pashë nuk ngurroj ta përshkruaj ngjarjen si masakër dhe krim kundër njerëzimit”.

Kryeministri Kurti shtoi mes tjerash se ambasadori Walker i shpalli botës të vërtetën gjenocidiale të regjimit të presidentit të atëhershëm jugosllav, Sllobodan Millosheviç, i cili vdiq në burg derisa gjykohej për krime lufte.

Kosova shënoi 25-vjetorin e Ditës së Lirisë apo Çlirimit të Kosovës – atëherë kur tankset britanike “Challenger” në rrugë tokësore dhe “Apache-t” amerikanë përmbi qiell, në kuadër të trupave paqeruajtëse të aleancës së NATO-s, filluan marshimin në Kosovë – pas fushatës ajrore të aleancës kundër caqeve ushtarake e policore serbe në Kosovë, Serbi e Mal të Zi.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.