Kurti në Greqi flet për sfidat globale: S’ka paqe të vërtetë derisa 1 për qind e të pasurve zotëron gjysmën e pasurisë

Kryeministri i Kosovës, Albin Kurti, në kuadër të edicionit të 26-të të Simpoziumit Ndërkombëtar (SYMI) në Greqi, i cili mbledh rreth vetes politikanë, akademikë dhe udhëheqës organizatash ndërkombëtare, ka thënë se bota ndodhet përballë tre sfidave globale të një niveli të paprecedent: ndryshimet klimatike, pabarazia shoqërore dhe kërcënimet e sigurisë.

Duke vënë theksin te pabarazia shoqërore, ai ka përmendur një studim të organizatës ndërkombëtare “Oxfam” sipas së cilës top 1 për qindëshi i më të pasurve posedon 45.6 për qind të pasurisë globale dhe 59 për qind të të gjitha aseteve financiare në botë. Në dekadën e fundit, ky 1 për qindësh ka vënë në zotërim më shumë se gjysmën e të gjithë pasurisë së re globale.

“Për aq kohë sa 1 për qind i më të pasurve zotërojnë gjysmën e pasurisë globale, kam drojë që nuk do të ketë paqe të vërtetë ndërmjet shoqërive dhe njerëzve dhe as me natyrën e planetit tonë”, ka theksuar kreu i ekzekutivit kosovar, në bazë të një njoftimi të lëshuar nga Zyra e Kryeministrit të dielën.

Ai ka folur edhe për rëndësinë e rikthimit dhe ruajtjes së domethënies por edhe konkretizimit të ideve të mëdha të lirisë, barazisë, demokracisë dhe drejtësisë dhe për nevojën për të fituar zgjedhje demokratike në mënyrë që të ketë qeverisje demokratike, derisa ka shtuar se një gjë e tillë nuk ka qenë më shumë e rëndësishme qysh prej përfundimit të Luftës së Dytë Botërore.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.