![](https://albanianpost.com/wp-content/uploads/2024/04/albin-kurti-asociacioni-tema.png)
Kryeministri i Kosovës, Albin Kurti, ka thënë se e respekton Marrëveshjen për Asociacionin e Komunave me Shumicë Serbe, por, në vlerësimin e tij, nuk është as urgjencë e as esencë.
Këto komente, Kurti i ka bërë në një intervistë për “A2CNN”, ku ka deklaruar se çështja e Asociacionit është dashur që të përfundojë në kohën kur kryeministër ka qenë Hashim Thaçi.
“Asociacionin është dashur këta që ta kryejnë me Hashim Thaçin. Këta kanë pritur që unë vij në pushtet dhe ua kryejë Asociacionin e Hashim Thaçit a? S’është reale kjo punë, është absurde”, tha Kurti.
Kreu i ekzekutivit potencoi se qytetarët e Kosovës “më kanë votuar mua për punësim dhe drejtësi dhe këtë po e bëj”.
“Pse nuk e bënë atëherë, pse pritën me ardh unë, që e kundërshtoja ‘Zajednicën’? Paskan pritur që të vijë unë që e kundërshtoja ‘Zajednicën’ me kry ‘Zajednicën’? Jo”, shtoi.
Ai potencoi se me Serbinë tani ka marrëveshje të re, atë Bazike [Bruksel më 27 shkurt, Ohër 18 mars], në të cilën përsëri është Asociacioni.
“Neni 7 thotë vetëmenaxhim të komunitetit serb, neni 10 thotë gjitha marrëveshjet janë ligjërisht të obligueshme, 39 sosh, dy prej tyre kanë të bëjnë me Asociacionin, janë neni 10, unë i respektoj, nuk e mohoj trashëgiminë, por nuk e kam ndërmend ta bëjë as esencë as urgjencë”, deklaroi.
Kurti: Draftin evropian ta dërgojnë në Komisionin e Venedikut, për mua është një “non-paper”
Kryeministri i Kosovës, Albin Kurti, ka thënë se draft-statuti i Asociacionit të Komunave me Shumicë Serbe që Miroslav Lajçak dhe emisarët e tjerë evropianë ia sollën në zyrë më 21 tetor të vitit të kaluar, e për të cilin kishte dhënë vlerësime, është një “non-paper”, dhe si i tillë nuk do të dërgohet në Gjykatën Kushtetuese.
Këto komente, Kurti i ka bërë në një intervistë për “A2CNN”, ku u ka propozuar ndërkombëtarëve, të cilët po kërkojnë që drafti evropian për Asociacionin të dërgohet në Kushtetuese që kështu t’i hapet rruga Kosovës për anëtarësim në Këshillin e Evropës, që ta çojnë në Komision të Venedikut.
Në Kushtetuese, Kurti ka theksuar se mund të dërgojë vetëm ndonjë draft që ai do ta shkruante për këtë mekanizëm.
“Draftin e Lajçak-ut dhe të emisarëve të tjerë lirisht le ta çojnë te juristët eminentë në Këshill të Evropës edhe në Komision të Venedikut”, tha Kurti.
“Unë e shkruaj një draft nëse dakordohemi me këto tri parime, por drafti duhet të jetë pjesë e paketës, ku e kemi Marrëveshjen Bazike të 27 shkurtit, të aneksit të zbatimit të Ohrit të 18 marsit, dhe unë nuk e mohoj që Asociacioni përbrenda kësaj pakete do të mund ta kishte vendin e vet, sepse ka të bëj me nenet 7 dhe 10 të Marrëveshjes Bazike, nuk ka problem”, shtoi.
Ai potencoi se “nuk mundesh tash Asociacionin ta nxjerrësh nga paketa, ta hedhësh tutje paketën dhe këtë Asociacion, t’ia bësh një draft ndërkombëtar e testoje në Gjykatën tënde Kushtetuese”.
“Pra, edhe po e nxjerr nga paketa duke e vënë në prapaskenë paketën, po e vendos si çështje urgjente dhe qendrore dhe po thua përdore Gjykatën tënde Kushtetuese. Jo. Përdoreni ju në Komisionin e Venedikut, Lajçak dhe emisarët e tjerë sepse dokumenti është i tyre nuk është i imi, dokumentin tim unë e çojë në Gjykatën Kushtetuese”, potencoi.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com