“Kurti i cili konsideron veten i përkushtuar ndaj interesave kombëtare po i largon miqtë e Kosovës pa të cilët s’mund të mbijetojë si një vend i pavarur e i sigurt”

Për ekspertin amerikan, i cili ka qenë i përfshirë në mënyrë të drejtpërdrejtë në negociatat izraelito-siriane dhe izraelito-palestineze në formatin “Track II” e njohur ndryshe si “diplomacie e kanaleve të pasme” Alon Ben – Meir, kryeministri i Kosovës, Albin Kurti është i zhytur në obsesionin e tij me Serbinë, duke mos e kuptuar kurrë se pavarësia, siguria dhe mirëqenia e Kosovës nuk varen nga ajo që thotë apo bën presidenti i Serbisë, Aleksandër Vuçiç, por nga angazhimet e Bashkimit Evropian dhe Shteteve të Bashkuara të Amerikës për të ruajtur sigurinë dhe pavarësinë e Kosovës.

Sipas Ben-Meir, i cili ka qenë ligjërues i Marrëdhënieve Ndërkombëtare në Qendrën për Çështjet Globale në Universitetin e Nju Jorkut, është e habitshme se përse një politikan si Kurti që e konsideron veten të ditur dhe i përkushtuar ndaj interesave kombëtare të vendit të tij, arrin të largojë miqtë e tij më të mirë, pa të cilët Kosova nuk mund të mbijetojë si një vend i pavarur dhe i sigurt.

“Ndoshta Kurti duhet të marrë pak kohë dhe të reflektojë se pse dhe në çfarë rrethanash BE-ja mund të minojë interesat kombëtare të Kosovës vetëm për të qetësuar Serbinë”, ka shkruar Ben-Meir në bllokun e tij.  

Pikëpamja e Kurtit se BE-ja po dëshiron të akomodojë Serbinë në kurriz të Kosovës, sipas ekspertit amerikan është edhe e gabuar edhe kundërproduktive.

“Ai duhet ta dijë se nëse dëshiron që Kosova të anëtarësohet në BE në një të ardhme të afërt, duhet të punojë krah për krah me BE-në në çdo aspekt dhe të shmangë çdo konflikt që mund të pengojë procesin e integrimit të vendit të tij”, argumenton eksperti amerikan.

BE-ja fajësoi Kosovën për dështimin e takimit të 15 shtatorit në mes të Albin Kurtit dhe Aleksandër Vuçiç-it me arsyetimin se ishte pikërisht pala kosovare ajo që nuk e pranoi propozimin e Unionit për sekunecimin e zbatimit të Marrëveshjes së Brukselit/Ohrit.

Sipas Ben-Meir, Kurti duhet ta ketë të qartë se fajësimi i Kosovës nga ana e BE-së për dështimin e dialogut “nuk është i pabazë”.

Ai beson se Kurti po gabon kur po pohon se Kosova do ta zbatojë të gjithë marrëveshjen në tërësi ose nuk do ta zbatojë vetëm atë që dëshiron Serbia.

“Kjo logjikë ka vdekur”, thekson Ben-Meir.

Problemi në këtë fazë të dialogut, sipas Ben-Meir, është se Kurti dhe Vuçiç po kërkojnë që tjetri të bëjë hapin e parë në zbatimin e marrëveshjes.

Kurti fillimisht kërkon njohjen defacto nga Serbia e më pastaj zbatimin e Asociacionit të Komunave me Shumicë Serbe, Vuçiç-i të kundërtën – njëherë Asociacioni më pastaj nenet e tjera të Marrëveshjes së Brukselit/Ohrit.

“Në këtë aspekt, megjithatë, barra bie krejtësisht mbi supet e Kurtit, i cili deri më tani ka refuzuar themelimin e Asociacionit, për të cilin Kosova kishte rënë dakord dhe duhej të zbatohej shumë kohë më parë. Për më tepër”, shpjegon më tej ai.

Nëse qëllimi i Kurtit është të integrojë Kosovën në komunitetin evropian, shpjegon më tej Ben-Meir, ai duhet të përmirësojë marrëdhëniet e tij me BE-në, duke ia hapur derën për pesë vendet e BE-së që nuk e kanë njohur ende Kosovën—Qipron, Spanjën, Rumaninë, Greqinë, dhe Sllovakia—për ta bërë këtë.

“Gjë që është një domosdoshmëri përpara se Kosova të anëtarësohet në bllok. Ai duhet të tregojë se është të punojë me BE-në për të zgjidhur çdo çështje konfliktuale ndërmjet Kosovës dhe Serbisë dhe të mos i hedhë poshtë lehtësisht këshillat e ofruara nga Borrell”.

Së treti, shkruan Ben-Meir, Kurti duhet të kujtojë se ekziston një shqetësim i madh në Perëndim se Rusia mund të përdorë Beogradin për të rindezur konfliktet etnike në Ballkan, veçanërisht pas agresionit në Ukrainë.

“Për të parandaluar që kjo të ndodhë, BE-ja duhet të tërheqë Serbinë në orbitën e saj. Është marrëzi të supozohet se përpjekjet e BE-së në këtë aspekt do ta dëmtojnë Kosovën në çfarëdo forme. Përkundrazi, sa më shumë që Serbia t’i afrohet BE-së, aq më mirë është për Kosovën, pasi kjo do të çonte pa ndryshim në një atmosferë më të favorshme që do të përshpejtonte procesin e normalizimit ndërmjet Kosovës dhe Serbisë, si dhe njohjen e saj nga Beogradi”.

Sipas Ben-Meir është koha që Kurti të zbresë në tokë dhe të mos marrë më pozicione krejtësisht të papajtueshme me atë që dikton realiteti.

“Nocioni se BE-ja po vepron kundër interesit të Kosovës është krejtësisht i gabuar. Të thotë Kurti në një konferencë për media në Prishtinë se ka pasur një pozicionim të qartë të ndërmjetësuesit Miroslav Lajçak kundër Kosovës është vërtet absurde”.

Qasja aktuale e Kurtit, sipas Ben-Meir, nuk ka bërë gjë tjetër veçse i ka dëmtuar ndjeshëm marrëdhëniet e tij me BE-në deri në një pikë ku kjo e fundit u detyrua të vendosë sanksione ndaj Kosovës, gjë që tregon se sa thellë janë fundosur lidhjet e tyre dypalëshe.

“Nëse Kurti vazhdon të udhëtojë në këtë rrugë qorre, BE-ja nuk do të ketë zgjidhje tjetër veçse të presë derisa të formohet qeveria e ardhshme në Kosovë dhe ta lërë Kurtin pa asgjë”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.