Kurti: Humbje e madhe vdekja e Dion dhe Mirsada Ademaj nga vërshimet në Pejë

Kryeministri i Kosovës, Albin Kurti, ka thënë se me pikëllim të thellë e ka marr lajmin për humbjen tragjike të jetëve të dy qytetarëve, Dion Ademaj dhe Mirsada Ademaj, nga vërshimet e së shtunës në Pejë.

“Kjo humbje e madhe për familjet Ademaj dhe Hoxhiq është humbje e madhe për vendin tonë. Në këto ditë të rënda, dhembjen e ndajmë bashkë me familjarët dhe miqtë e tyre”, shkroi Kurti në Facebook.

“Në emër të Qeverisë së Republikës së Kosovës dhe në emrin tim personal, ju shpreh ngushëllimet më të sinqerta”.

Ndërkaq dy personave të të lënduar, kryeqeveritari kosovar u ka uruar shërim sa më të shpejtë.

Kurti ka treguar se Qeveria është e angazhuar me kapacitetet e saj me Forcën e Sigurisë së Kosovës dhe Agjencinë për Menaxhimin e Emergjencave që të ndihmojë në përballimin dhe tejkalimin e pasojave të vërshimeve.

“Ministri i Mbrojtjes, Armend Mehaj, Ministri i Punëve të Brendshme, Xhelal Sveçla dhe Ministri i Administrimit të Pushtetit Lokal, Elbert Krasniqi, janë në komunikim me Komunën e Pejës për të koordinuar veprimet në ofrim të mbështetjes së nevojshme”.

Edhe kryetari i Kuvendit të Kosovës, Glauk Konjufca, ka shprehur ngushëllimet e tij për familjarët e dy viktimave të vërshimeve në Pejë.

“Kjo fatkeqësi na prek secilin dhe ka tronditur të gjithë qytetarët e Kosovës.Në këto momente qëndrojmë pranë familjarëve të viktimave, siç jemi pranë të gjithë qytetarëve të Pejës, të cilët kanë pësuar nga këto vërshime”, ka shkruar ai në Facebook.

Kreu i Kuvendit ka pohuar se njësitet përkatëse të emergjencave me profesionalizmin e tyre janë duke ofruar ndihmën dhe punën e tyre deri në stabilizim të plotë të situatës.

“Uroj shërim sa më të shpejtë për të lënduarit si pasojë e kësaj fatkeqësie”.

Ndryshe, një pesë vjeçar dhe nëna e tij kanë vdekur si pasojë e vërshimeve në qytetin e Pejës të shtunën.

Sipas policisë dy persona janë lënduar dhe janë dërguar për trajtim në spital.

Po ashtu sipas organeve të rendit, trupi i viktimës është gjetur në orët e para të së dielës.

“Drejtoria Rajonale e Policisë Pejё, njofton se me datё 24.06.2023 si pasojё e vërshimeve nё qytetin e Pejёs, nё lagjen “Asllan Qeshme” njё fёmijё ka humbur jetën ndërsa nëna e tij ёshtё e zhdukur. Pas kërkimeve nga njësitet policore rreth orёs 01:20, tё datës 25.06.2023, ёshtё gjetur personi i zhdukur femër , vdekjen e viktimës e ka konstatuar ekipi mjekësor”, thuhet në njoftim.

Parashikimi i motit për të dielën

Instituti Hidrometeorologjik i Kosovës, parashikon që sot mbi vendin tonë të mbajë mot me diell dhe me shi, derisa temperaturat do të bien për 3 deri 8 gradë celsius.

“Pas këtyre temperaturave të larta që u regjistruan ditëve të fundit mbi vendin tonë, situata meteorologjike po ndryshon , duke bërë që merkuri në termometër të ulët mesatarishtë për 3-8 gradë Celsius. Kjo pasi që vikendi parashihet të shoqërohet fillimisht me diell por gjatë ditës, kryesisht pjesët e dyta të ditës do të ketë kushte që vende-vende të ketë reshje dhe shkarkime rrufesh, (nuk do të jenë sasi të mëdha të reshjeve)”, ka njoftuar IHMK-ja.

Ndërkaq temperaturat minimale do të lëvizin ndërmje14-18 gradë celsius, ndërsa maksimalet e ditës do të shoqërohen ndërmjet 22-30 gradë celsius.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.