![](https://albanianpost.com/wp-content/uploads/2024/07/8d164352-608d-408b-abc5-1da48e7eb4bb.jpg)
Kryeministri i Kosovës, Albin Kurti, ka deklaruar se hapja e Urës së Ibrit nuk është kundër e askujt por kjo do të bëhet për të ndihmuar qytetarët, për tregti, ekonomi e bashkëpunim pasi nga këndvështrimi i tij s’është në rregull që ajo të qëndrojë e mbyllur.
Ai para gazetarëve në një konferencë për media ka sqaruar se kjo nuk është kundër askujt, por për të gjithë.
“Natyrisht që askush nuk mund të thotë që kjo është një gjë e mirë dhe e drejtë, por ne dëshirojmë që edhe të zbatohet ligji edhe të respektohet liria e lëvizjes, por në të njëjtën kohë edhe të kemi paqe dhe liri për të gjithë”.
“Hapja e urës kryesore mbi lumin Ibër, nuk është kundër askujt por është për qytetarët dhe për mallrat e kapitalin. I ndihmon njerëzit pa dallim etnie, gjithashtu tregtinë, ekonomin e bashkëpunimin. Janë edhe tri ura të tjera mbi lumin Ibër dhe të mbetet vetëm kjo urë e mbyllur për vetura nuk mendojmë që është në rregull”, ka thënë Kurti.
Të mërkurën, Kurti gjatë takimit që kishte pasur me ambasadorët e shteteve të QUINT-it (Gjermani, SHBA, Itali, Francë dhe Britani e Madhe) dhe Shefin e Zyrës së Bashkimit Evropian, kanë diskutuar për hapjen e Urës mbi lumin Ibër – që lidh Mitrovicën e Jugut me atë të Veriut.
“Në kuadër të informimit dhe koordinimit me partnerët tanë ndërkombëtarë, temë trajtimi në këtë takim ishte gjithashtu rëndësia e bashkërendimit të veprimeve institucionale për hapjen e urës mbi lumin Ibër edhe për vetura, në mënyrë që të mundësohet liria e plotë e lëvizjes e cila i ndihmon qytetarët në të dy anët e urës, pa dallim, dhe në të njëjtën kohë i shërben zhvillimit të ekonomisë dhe tregut përmes lëvizjes më të lehtë të mallrave dhe kapitalit”, thuhet në njoftim.
Përveç kësaj, bëhet me dije se është diskutuar edhe rreth zhvillimeve të fundit, situatën e sigurisë e të sundimit të ligjit dhe zhvillimin e gjithmbarshëm.
Për më shumë se dy dekada Ura e Ibrit gjithmonë është parë si simbol i ndarjes etnike në Mitrovicë.
Ndonëse përpjekjet për hapjen e urës datojnë qysh herët, gjithmonë të njëjtat kanë hasur në sfida të ndryshme ndër vite.
Një mundësi e re për ta hapur Urën e Ibrit ishte rikthyer nga Kuvendi Komunal i Mitrovicës së Veriut, por prapë me kundërshtime nga ndërkombëtaret, pasi kjo “mund të dërgojë në tensione të reja”.
Prandaj, të gjitha veprimet po kërkohen të merren në kuadër të dialogut, në të kundërtën çdo hap tjetër do të konsiderohet si “veprim i njëanshëm” i Kosovës, ishte thënë nga ndërkombëtarët.
Hapja e Urës së Ibrit, shans i ri për lidhje dhe/apo rritje tensionesh?
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com