Lajme

Kurti flet sërish “për rrëzimin e qeverisë”


Kryeministri i Kosovës, Albin Kurti, gjatë seancës së Kuvendit ku është ftuar për interpelancë për “masat urgjente të Qeverisë në raport me situatën e krijuar në vend” ka thënë se se ekzekutivi nuk varet nga votat e Listës Serbe.

Prandaj, thotë se është e pamundur që të “rrëzohet qeveria”.

“Sikur të ishim në qeveritë e kaluara ku shumica bëhej e varej nga Lista Serbe me siguri që do të kishte mocion mosbesimi për të më rrëzuar, por ja që kjo nuk është e mundur tash”, tha Kurti.

Për Kurtin, reciprociteti me targa dhe letërnjoftime do të duhej të ishte motiv i mjaftueshëm për ata që provojnë që ta rrëzojnë qeverinë e tij.

“Por, tash Qeveria e Kosovës nuk varet nga votat e Listës Serbe”.

Megjithatë, ai theksoi se “serbët nuk kanë asnjë problem me ne”

“I kanë pranuar qortimet për përdorimin e targave ilegale. 1800 qortime janë shpërndarë, por serbëve u janë djegur veturat që kanë vendosur targat RKS”, shtoi ai.

Kurti ka treguar se e ka pezulluar vendimin për targat, për siç tha “për t’i dhënë hapësirë propozimit evropian”.

“Tani i takon sponsoreve të këtij plani që një afat sa më të shpejt të arrijmë një marrëveshje për normalizim”.

Ndërsa për dialogun me Serbinë, ai theksoi se ka ftuar politikanët për konsultim, përfshirë edhe thirrësin e interpelancës deputetin e Aleancës për Ardhmërinë e Kosovës, Ramush Haradinaj.

“Ajo që na bashkon është sovraniteti dhe integriteti territorial. Qytetarët kanë votuar për qasjen e re në dialog. Kritikat i mirëpres, por në të njëjtën kohë, duhet ta kuptoni qartësisht, drejtësinë dhe dobinë e kësaj qasje të re.

Për largimin e serbëve nga institucionet e Kosovës, thekson se kanë qenë politike.

“Dorëheqja politike nuk mund të pasohet me thirrje politike për kthim. Duhet të aplikojnë në mënyrë profesionale ata që duan ato vende të punës”, potencoi ai.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore