Kurti e Vitia premtojnë investime në sistemin shëndetësorë për luftimin e kancerit të gjirit

Ministri i Shëndetësisë, Arben Vitia, në muajin e ndërgjegjësimit për kancerin e gjirit ka deklaruar se është investuar në aparaturën që mundëson zbulimin dhe trajtimin e sëmundjeve malinje.

Vitia, në një konferencë të përbashkët me kryeministrin e Kosovës, Albin Kurti për nder të këtij muaji u shpreh se edukimi dhe kontrolli i rregullt janë faktor kyç për zbulimin e hershëm dhe trajtimin e suksesshëm të kësaj sëmundjeje.

“Kanceri i gjirit si në nivel global ashtu edhe në vendin tonë është në statistika të njëjta. Synimet nuk mund të arrihen pa e rritur financimin, të cilën Qeveria jonë e ka rritur dhe ka investuar në aparaturën e zbulimit dhe trajtimit të sëmundjeve malinje”, ka thënë Vitia.

Ndërsa, potencoi se të gjitha këta janë obligime të institucioneve e që duhet të përmbushen.

“Të gjitha këto veprime janë detyrim i yni po ritheksojmë faktin se edukimi, kontrolli i rregullt janë faktori kyç për zbulimin e hershëm dhe trajtimin e suksesshëm të kësaj sëmundjeje. Mbështetja e grave të prekura, mbështetja emocionale me psikologë e profile të tjera për këto gra është e domosdoshëm”.

Ndërsa, kryeministri i Kosovës, Albin Kurti tha se zbulimi i hershëm i kancerit është parakusht që të shpëtohen jetë njerëzish.

Teksa u ka bërë thirrje të gjitha grave e vajzave që të bëjnë kontrolle të vazhdueshme në mënyrë që të parandalohet kjo sëmundje.

“Jam i gëzuar që jam këtu me ju për të hapur fushatën kundër kancerit të gjirin, një sëmundje e përhapur jo vetëm në vendin tonë. Jemi bashkë në këtë betejë, duke e ditur se një në shtatë vdekje vijnë nga kanceri i gjirit”.

“Fokusi është në zbulimin e hershëm, për këtë angazhohemi në investime në sistemin shëndetësor. Iu bëjmë thirrje grave e vajzave që të kontrollohen vazhdimisht. Si Qeveri kujdesimi që të zbulojmë hershëm këtë sëmundje dhe të kemi trajtimin e duhur. Në këtë betejë për jetë Ministria po punon në zgjerimin e trajtimit të kimioterapisë edhe në Spitale Regjionale”.

Ai ka theksuar se me rritjen e buxhetit për barna, do të përmirësohen edhe kushtet që kanceri i gjirit tek gratë të zbulohet më hershëm.

“Kemi rritu ndjeshëm buxheti për barna. Kemi dy pajisje të teknologjisë fundit për trajnimin e kësaj sëmundje. Statistika tregojnë që një në tetë gra kanë kancer të gjirit”.

“Në nëntë muajt e fundit 332 pacientë janë diagnostikuar me kancer të gjirit, iu bëjë thirrje të gjithëve për kontrolle të vazhdueshme. Të gjitha grave iu themi se nuk janë vetëm dhe se sëmundjen do ta mundim bashkë”.

Drejtoresha e “Jeta Vitia”, Nafije Latifi, deklaroi se mënyra se si aktualisht punon klinika e Onkologjisë është në kushte të vështira.

“Këtë vit synimi ynë janë komunitetet me qëllim që ta shtrijmë vetëdijen te e gjithë popullata. Klinika e Onkologjisë me një staf shumë punëtorë punon në kushte të vështira, me kërkesa të mëdha për trajtim, mungesë shtretërish”.

Ajo shtoi se të gratë e operuara nga kanceri iu mundësohet mbulimi i shpenzimeve nga institucionet për ristrukturim të gjirit.

“Kërkesa jonë është që gratë që janë operuar nga kanceri i gjirit t’iu mundësohet mbulimi i shpenzimeve nga institucionet për ristrukturim të gjirit”.

Muaji tetor në gjithë botën shënohet si muaj i ndërgjegjësimit për zbulimin e hershëm të kancerit të gjirit. Muaji i ndërgjegjësimit për kancerin e gjirit është një fushatë vjetore ndërkombëtare që synon të shpërndajë informacion dhe të edukojë njerëzit për rëndësinë e shëndetit të gjirit, për zbulimin e hershëm të kancerit të gjirit te gratë dhe vajzat, në të gjithë botën.

Nga hulumtimet dhe të dhënat botërore që i ka prezantuar Bordi Nacional i Kancerit në Kosovë, thuhet se në botë janë 14 milionë raste të reja në vit me kancer, derisa parashihet që deri në vitin 2030, numri i rasteve me kancer të arrijë shifrën prej 21.7 milionë në vit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.