Kurti e Sveçla e shkarkuan – por Fadil Kodrën e rikthen sërish në punë KPMSHCK

Për dy herë radhazi Fadil Kodra, ishte shkarkuar nga pozita e drejtorit të Agjencisë për Menaxhimin Emergjent (AME).

Në muajin tetor të 2022, kryeministri i Kosovës, Albin Kurti e kishte shkarkuar nga pozita e drejtorit Kodrën, por Këshilli i Pavarur Mbikëqyrës për Shërbimin Civil të Kosovës, sërish ka vendosur që ta kthejë atë në vendin e tij të punës, të martën e 18 janarit.

Lajmin për Albanian Post e ka konfirmuar avokati Faton Fetahu.

“Po, të martën e kam pranuar vendimin nga Këshilli i Pavarur Mbikëqyrës për Shërbimin Civil të Kosovës (KPMSHCK), ku Fadil Kodra kthehet në pozitën e tij të punës, pasi shkarkimi i tij rezultoi të ishte i paligjshëm”.

“Sikurse herën e parë, kur e shkarkoi ministri i MPB-së, Xhelal Sveçla dhe herën e dytë kur e shkarkoi kryeministri, Albin Kurti”, tha Fetahu për AP.

Herën e parë ai ishte shkarkuar nga ministri i Punëve të Brendshme, Xhelal Sveçla më 15 korrik 2022.

Por, që një vendim i tillë në shtator ishte anuluar nga Këshilli i Pavarur Mbikëqyrës për Shërbimin Civil të Kosovës (KPMSHCK), ky këshill kishte obliguar ministrin që brenda 15 ditëve ta kthejë prapë Kodrën në punë.

Më 20 shtator 2022, Sveçla kishte kthyer në punë Kodrën, për të marrë vendimin për largimin e tij pas vetëm një muaji së bashku me kryeministrin.

Ndaj ministrit, ishte dorëzuar edhe kallëzim penal për “cenim të të drejtave në marrëdhëniet e punës dhe keqpërdorim të pozitës apo autoritetit zyrtar”.

Kryeministri e kishte shkarkuar atë me arsyetimin se Kodra ka shkelur autoritetin zyrtarë.

Sipas kryeministrit dhe vlerësimit të tij, vendimi për Kodrën nuk ka pasur nevojë të shkoj në prokurori dhe të vlerësohet në gjykatë.

Prapaskenat e vendimit që çuan në kallëzim penal për ministrin Sveçla – i dëmtuari e njoftoi kryeministrin, por s’u përfill nga Kurti

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.