Kurti dakordohet për thellim të marrëdhënieve me Radevin: Kemi një histori të përbashkët në Ballkan dhe një të ardhme në BE

Kryeministri i Kosovës, Albin Kurti të premten është takuar me presidentin e Bullgarisë, Rumen Radev, me të cilin është dakorduar për thellimin e marrëdhënieve Kosovë – Bullgari.

Përmes një komunikate për media nga Zyra e Kryeministrit është thënë se bashkëpunimi synohet të rritet në ekonomi, energji, siguri dhe turizëm.

“Ne jemi mirënjohës për mbështetjen e Bullgarisë në momente vendimtare për vendin dhe popullin tonë, duke përfshirë edhe vitin 1999 kur ju hapët qiellin për fushatën e bombardimeve të NATO-s, i cili ndaloi gjenocidin e Serbisë dhe e mbyllët atë për qëllimin keqdashës të Rusisë dhe veprimin e rrezikshëm, jo vetëm për Kosovën”.

“Falënderoj Bullgarinë për mbështetjen e vazhdueshme për anëtarësimin tonë në organizatat ndërkombëtare, integrimin në BE, Këshillin e Evropës dhe në bashkëpunimin rajonal, duke përfshirë Procesin e Berlinit. Kënaqësi e madhe t’iu kemi këtu, mirëserdhët”, ka thënë Kurti.

Ndërsa, Radevi ka potencuar se vizita e tij në Kosovë është me synime të qarta.

“Ne kemi ardhur këtu me një mision të qartë: për të thelluar miqësinë dhe marrëdhëniet tona në të gjitha fushat e mundshme me interes të përbashkët, dhe për t’iu inkurajuar dhe mbështetur në përpjekjet tuaja për zhvillimin e Kosovës, si një shtet modern, demokratik, të pavarur e të integruar plotësisht në sistemin e komunitetit ndërkombëtar”, ka shtuar Radev.

Kurti, tutje ka shtuar se “të dy vendet dhe dy popujt kanë një histori të përbashkët në Ballkan dhe një të ardhme të përbashkët në Bashkimin Evropian ku vendi ynë ka aplikuar dhe aspiron të jetë anëtar”.

Ndërsa, ka potencuar rëndësinë e rritjes së bashkëpunimit, sidomos në fushën e ekonomisë ku mund dhe duhet të bëhet më shumë.

“U përmend dhe fusha e ICT-së, ku kemi potencial të madh, të rinj të talentuar dhe të shkathët e ku edhe jemi eksportues të shërbimeve të rëndësishme”, thuhet në njoftim.

Radev ritheksoi që Bullgaria është një vend mik i Kosovës dhe se është i interesuar që të rritet dhe thellohet bashkëpunimi dypalës.

“Në takim u vlerësua hapja e Odës Ekonomike Kosovë-Bullgari këtë qershor si dhe planifikimi i mbajtjes së Forumit të përbashkët Ekonomik vitin e ardhshëm, si një mundësi e mirë për të rritur raportet ekonomike”, vijon njoftimi.

Presidenti i Bullgarisë, Rumen Radev në një konferencë të përbashkët me presidenten e Kosovës, Vjosa Osmani, ka thënë se arritja e një marrëveshje mes Kosovës dhe Serbisë është me rëndësi kyçe për sigurinë e rajonit.

Radev, theksoi se në procesin e anëtarësimit të Ballkanit Perëndimor, Kosova nuk duhet që të lihet anash.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.