Kurti: BE-ja projekti më i rëndësishëm politik që nga Lufta e Dytë Botërore

Kryeministri i Kosovës, Albin Kurti, ka qenë folës në një panel diskutimi në margjinat e forumit ekonomik Delfi në Greqi, me temën “Ballkani Perëndimor në tabelën e re gjeopolitike të shahut”, ku bashkë me të ishte ish-presidenti i Bullgarisë, Rosen Plevneliev.

Kurti aty ka thënë se Bashkimi Evropian është projekti “më i rëndësishëm politik dhe procesi historik i paqes dhe prosperitetit që nga Lufta e Dytë Botërore, të cilin ne duhet ta ushqejmë dhe mbrojmë”.

“Në qershor do të bëhen njëzet vjet nga Samiti i Selanikut dhe premtimi për anëtarësimin e Ballkani Perëndimor”, tha Kurti.

Ndërkaq, kreu i ekzekutivit kosovar potencoi se “për të bërë një hap të madh përpara, nevojitet një mendim i ri”.

Kurti, gjatë ditës së sotme, duke marrë pjesë në margjinat e forumit ekonomik “Delphi” në Greqi, është takuar edhe me të deleguarin special të Bashkimit Evropian për dialogun Kosovë-Serbi, Miroslav Lajçak, e temë e diskutimit ishte takimi i ardhshëm me presidentin serb, Aleksandër Vuçiç.

Sipas kryeministrit Kurti, Marrëveshja e dakorduar fillimisht në Bruksel më 27 shkurt, e më pastaj e përforcuar me aneksin e zbatimit më 18 mars në Ohër të Maqedonisë së Veriut, duhet të zbatohet plotësisht dhe shpejt.

“Pa asnjë parakusht dhe pa asnjë vonesë”, shkroi Kurti në rrjetin e tij social në Twitter.

Për takimin me kreun e ekzekutivit kosovar njoftoi edhe i dërguari special i Bashkimit Evropian për dialogun Kosovë-Serbi, Miroslav Lajçak. Njëjtë si Kurti edhe ai tha se fokusi i takimit ishte takimi i ardhshëm.

“Në delphiforum në takimin tim me kryeministrin Albin Kurti, theksova rëndësinë e takimit të dialogut më 2 maj”, shkroi ai në Twitter.

Ndërkaq, diplomati sllovak nënvizoi se takimi i ardhshëm në mes të Kurtit dhe Vuçiç-it “do të jetë një hap i rëndësishëm përpara”.

“Është e rëndësishme të shmangni çdo veprim që mund të përkeqësojë atmosferën”, tha ai.

Po ashtu, gjatë ditës Kurti në Greqi u takua edhe me të deleguarin e Britanisë së Madhe për Ballkanin Perëndimor, Stuart Peach, me të cilin po ashtu ka diskutuar për procesin e dialogut.

“Në takim gjithashtu u bisedua edhe për raportet ndërmjet Kosovës dhe Serbisë, rëndësinë dhe urgjencën e zbatimit të plotë dhe të pakushtëzuar të Marrëveshjes Bazë dhe Aneksit të Zbatimit të dakorduar në Bruksel, respektivisht në Ohër, dhe për pritjet nga takimi i radhës i nivelit të lartë politik që do të mbahet të martën e javës së ardhshme”, thuhej në komunikatën për media e lëshuar nga Zyra e Kryeministrit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.