Kurti: 25 vjetorin e çlirimit po e festojmë duke qëndruar bashkë me aleatët

Kryeministri i Kosovës, Albin Kurti, në një seancë solemne të Kuvendit të Kosovës për nder të 25 vjetorit të Ditës së Çlirimit, ka thënë se Kosova këtë çerekshekull në liri po e feston duke qëndruar bashkë me aleatët, “njësojë si me 12 qershor dhe njësoj si në ditët e para të çlirimit”.

Kurti gjatë fjalimit potencoi se Serbia, sikur para 25 vjetëve edhe sot është rreshtuar prapa Rusisë, ashtu siç Rusia qëndron prapa shumë veprimeve të Serbisë.

“Kurse shteti ynë, Kosova dhe populli i saj, bashkë me Shqipërinë, në vazhdimësi ka shkuar duke i forcuar lidhjet dhe aleancën e saj me Shtetet e Bashkuara të Amerikës, me Britaninë e Madhe, me Gjermaninë dhe Turqinë, me Francën dhe Italinë dhe me vendet e tjera partnere perëndimore”, shtoi ai.

Duke kujtuar krimet çnjerëzore të Serbisë në Kosovë, Kurti gjatë fjalimit të tij ka potencuar se Kosova tash 25 vjet më pas dëshiron që të gjithë “qytetarët të gëzojnë e të fitojnë, shumica shqiptare bashkë me pakicat”.

“Duam marrëdhënie të mira fqinjësore evropiane, me njohje reciproke e bashkëpunim të shumë anshëm në gjithë rajonin tonë, pa sulme dhe agresione, pa diskriminime e shfrytëzime, sot me vetëdije më të lartë politike dhe me kujtesën më të lartë kolektive po e kujtojmë 12 qershorin e vitit 1999 ditën e Çlirimit të Kosovës”.

Kurti tutje ka falënderuar vendet mike për kontributin e dhënë në çlirimin e Kosovës.

“Të bashkohemi fizikisht e shpirtërisht si jemi bashkuar sot në sheshet e qyteteve me qytetarët tanë për të shënuar një ngjarje historike që na e ka sjell të tashmen dhe na e ka përcaktuar të ardhmen”, ka thënë Kurti.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.