“Kurti 2” njëjtë si “Kurti 1”

Albulena Haxhiu, Besnik Bislimi, Arben Vitia, Rozeta Hajdari dhe Xhelal Sveçla pritet të rikthen prapë në ulëset e ministrave në qeverinë “Kurti 2”, posa të votohet në Kuvendin e Kosovës.

Një burim brenda Lëvizje Vetëvendosje i ka thënë Albanian Post se këta emra janë diskutuar edhe brenda kësaj partie dhe pritet që të emërohen prapë ministra.

“Këta emra do të jenë prapë ministra sipas gjitha gjasave pasi Albin Kurti ka qenë i kënaqur me performancën e tyre. Këtë e ka thënë Kurti edhe gjatë fushatës, që këta ministra kanë treguar rezultate të mira sa kanë qenë në këto pozita”, tha ky burim brenda LVV-së.

Në pozitën e ministrit të Financave pritet të rikthehet Besnik Bislimi nga Gjilani, edhe pse në zgjedhjet e fundit nuk garoi fare për deputet, por mban pozitën e nënkryetarit të partisë.

Edhe Albulena Haxhiu do të ulet prapë në karrigen e ministres së Drejtësisë, edhe pse nuk ishte në garë për deputete, pasi e kishte të ndaluar nga Gjykata Kushtetuese, meqë ishte dënuar për veprën penale: “përdorim të armës apo mjetit të rrezikshëm” në tri vitet e fundit.

Kurse ministër i Shëndetësisë, pritet riemërohet Arben Vitia, ndonëse brenda Lëvizjes Vetëvendosje ekziston edhe mendimi se Vitia duhet të lihet jashtë Qeverisë, pasi pritet të jetë kandidat për Kryetar të Prishtinës.

Ndërkohë në Ministrinë e Punëve të Brendshme dhe Administratës Publike, ka gjasa të mëdha të rikthehet Xhelal Sveçla, por këtë radhë si ministër.

Dikasteri i Ekonomisë, do t’i besohet prapë Rozeta Hajdarit, e cila është magjistre e shkencës për biznes dhe ekonomi.

Albanian Post ka tentuar që këtë informacion të konfirmojë duke tentuar që të bisedojë me zëdhënësin e kësaj partie Përparim Kryeziu, por ky i fundit ka qenë i paqasshëm.

Ndërkohë, analisti Rron Gjinovci, thotë për Albanian Post se të gjithë këta emra janë kredibilë për ministra.

“Gjithë këta emra janë persona që kanë treguar që munden me i udhëheq këto ministri edhe më duken të pranueshëm për me qenë ministra.

“Për 50 ditë kanë qenë në krye të detyrës”, shtoi Gjinovci.

“Në ministri të Brendshme vyen dikush që është i vendosur edhe që nuk tërhiqet, e Xhelali e ka kryer detyrën e vet mjaftë mirë”, shtoi Gjinovci.

Ndryshe nga Gjinovci, analisti tjetër Xhevdet Pozhari thekson se “përtej emrave të përveçëm me rëndësi është që kësaj radhe Albin Kurti do të ketë mundësinë dhe fuqinë e plotë që ta dëshmojë vizionin e tij si kryeministër veçanërisht në dy fushat e premtuara gjatë fushatës, drejtësi dhe punësim”

Sipas Pozharit, Vetëvendosje e ka mundësinë kësaj radhe për të dëshmuar para shumicës që ia ka dhënë besimin.

“Është e pritshme që drejtuesit e dikastereve qeveritare të jenë profesionistë të dëshmuar”, shtoi Pozhari.

“Megjithatë, i rëndësishëm mbetet edhe zëri përfaqësues në parlamentin e Kosovës, andaj nëse ndiqet kjo logjikë, jo detyrimisht të gjitha figurat qendrore do të jenë të përfshira në qeveri. Para se të gjithash, me rëndësi është një qeverisje me duar të pastra që do të realizonte objektivat e saj”.

Në fillim të këtij muaji, Kryetari i Lëvizjes Vetëvendosje, Albin Kurti tha se partia e tij i ka votat për të formuar qeverinë e re pas zgjedhjeve të 14 shkurtit.

“Do të jemi aty rrotull 60 deputetëve. Me siguri do ta kemi deputetin e komunitetit egjiptian Elbert Krasniqin, me siguri do ta kemi deputeten e komunitetit boshnjak, Emilia Rexhepi, do t’i kemi edhe disa të tjerë. Na nevojiten 61, do ta kalojmë numrin 61. Nuk do të kemi nevojë për kompromise me eksponentët e regjimit të vjetër sepse populli e do të renë. Populli e ka bërë prerjen, nuk e kemi ndërmend t’ia shkelim vullnetin e t’ia devijojmë dëshirën”, kishte thënë Kurti para gazetarëve në Tiranë.

Zgjedhjet e parakohshme parlamentare në Kosovë janë mbajtur më 14 shkurt. Sipas rezultateve preliminare Lëvizja Vetëvendosje ka fituar 47.85 për qind të votave, Partia Demokratike e Kosovës 17.41 për qind, kurse Lidhja Demokratike e Kosovës ka fituar 13.08 për qind dhe Aleanca për Ardhmërinë e Kosovës ka fituar 7.43 për qind të votave.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.