Stil

Kur moda bëhet e rrezikshme për shëndetin


Ilustrim

Moda do të thotë shumë gjëra: ndryshim, eksperimentim dhe më e rëndësishmja – argëtim. Megjithatë, disa gjëra që lidhen me modën mund të dëmtojnë trupin tuaj dhe të gjithë sistemin shëndetësor.

Një studim zbuloi se 73 përqind e njerëzve vuanin nga dhimbja e shpinës dhe probleme të ngjashme, për shkak të rrobave ose aksesorëve të modës që veshin.

Ekspertja e shtyllës kurrizore dhe qëndrimit, Del-Marie Day zbulon se si moda shkatërron shëndetin tuaj. “Nëse tashmë keni qëndrim jo të mirë, atëherë rrobat dhe këpucët e papërshtatshme, të ngushta ose të pakëndshme vetëm sa mund t’i përkeqësojnë gjërat”, paralajmëron ajo.

Taka të larta

Ndoshta e keni dëgjuar këtë më parë, por nuk është keq të përsërisni se veshja e takave të larta është një nga gjërat më të këqija që mund të bëni kur bëhet fjalë për qëndrimin tuaj. Kur ecni me taka, ju tendosni një pjesë të gishtave të këmbëve ndërsa busti juaj përkulet përpara.

“Për të ruajtur ekuilibrin në thembra, personi duhet të përkulet pak përpara. Koka është gjithashtu pak përpara dhe e gjithë kjo krijon presion në muskujt e qafës”. Kjo mund të zgjasë javë, muaj ose vite, dhe pasojat përfshijnë ngërçe në gishtat e këmbëve që përhapen në këmbë, dhimbje në shpinë dhe ijë.

Për fat të mirë, këpucët me taka më të ulëta janë në dispozicion në të gjitha dyqanet që mund t’ju duken po aq të mira dhe tërheqëse. Nëse ju pëlqejnë vërtet takat, sigurohuni që t’i vishni kur të mund të uleni në to. Qëndrimi me taka për orë të tëra është shumë i lodhshëm.

Sytjenat e papërshtatshme

Pavarësisht se mund të mendoni se është e pamundur që dikush të mbajë sytjena të papërshtatshme, 80 përqind e femrave i veshin ato. Madhësia e gabuar ushtron presion mbi shpatullat dhe mund të shkaktojë dhimbje në pjesën e poshtme të shpinës.

Më e rëndësishmja, përveç përmasave të duhura të koshit, është që pjesa e pasme e sytjenës të jetë aty ku duhet, sepse një sytjenë e vogël “ngjitet” në shpinë. As rripat shumë të hollë nuk janë të mirë, sepse pesha e gjoksit do të tërheqë supet përpara.

Xhinse të ngushta

Xhinset tepër të ngushta, janë në modë prej vitesh. Ato njihen edhe si “trend nga ferri”, sepse janë djallëzisht të parehatshme. Duke qenë se janë shumë të ngushta, mjekët pohojnë se këto xhinse nuk lejojnë që lëkura të marrë frymë, sidomos në zonën intime dhe për rrjedhojë rrisin rrezikun e infeksioneve.

Korseti

Mund të duket seksi, por në të njëjtën kohë është një nga veshjet më të diskutueshme në historinë e modës. Ajo është veshur nga zonjat gjatë Rilindjes, dhe është ende e njohur sot, veçanërisht në mesin e grave që duan të zvogëlojnë perimetrin e belit në këtë mënyrë. Hulumtimet e ekspertëve kanë treguar se veshja e shpeshtë e korseve zvogëlon kapacitetin e mushkërive, mund të dëmtojë organet e brendshme dhe madje të çojë në deformime të shtyllës kurrizore.

Çanta të mëdha

Sa më e madhe të jetë çanta, aq më shumë gjëra logjike mund të vendosni në të. Pak femra arrijnë të rezistojnë dhe të vendosin në një çantë të madhe aq gjëra sa mbajnë në një të vogël. Përveç kësaj, shumica e modeleve vishen në një shpatull, kështu që pesha shpërndahet në mënyrë të pabarabartë. Si rezultat, shpesh shfaqen probleme me çekuilibrin e muskujve (p.sh., njëra shpatull më e zhvilluar se tjetra). Çantat e rënda gjithashtu mund të shkaktojnë lëndime të vogla në qafë, brezin e shpatullave dhe shpinë.

Dietë dhe humbje e tepërt në peshë

Dieta serioze dhe kufizimi i marrjes së ushqimit për të arritur një pamje të dobët mund të komprometojnë seriozisht dhe ngadalësojnë metabolizmin tuaj, gjë që mund të çojë në shtim të papritur të peshës pas ndërprerjes së dietës. Një reduktim i mprehtë i marrjes së ushqimit nuk do t’ju ndihmojë të humbni peshë shpejt dhe të arrini rezultate afatgjata.

Pëlhura artificiale

Pëlhura artificiale si poliesteri, najloni, pëlhura prej fije artificiale dhe akriliku janë plot me kimikate të ndryshme dhe disa prej tyre janë potencialisht toksike. Ekspertët paralajmërojnë se duhet të shmangni veçanërisht rrobat që thonë se janë rezistente ndaj njollave, se janë të papërshkueshme nga uji, që thithin djersën dhe të ngjashme. Kjo do t’ju mbrojë nga kimikatet toksike që mbeten në lëkurën tuaj dhe hyjnë në qarkullimin e gjakut. Skuqja është problemi më i butë që mund të përjetoni duke veshur pëlhura artificiale.

Shpenzime të tepërta

Motoja “një herë jeton” mund të çojë në sjellje impulsive dhe shkatërruese – nga zakonet e pashëndetshme të të ngrënit deri te shpenzimi i pamatur i parave për një çantë dizajni që nuk është në përputhje me buxhetin tuaj. Ndërsa është e vërtetë që jetoni vetëm një herë dhe meritoni të shijoni jetën, është gjithashtu e rëndësishme që të merrni ato vendime që do të përfitojnë trupin, mendjen dhe portofolin tuaj.

/Albanianpost.com


Lajmet kryesore