Kur arti merr jetë nga realiteti i shtuar

Një telefon i kohës, aplikacioni shoqërues dhe… gjithçka tjetërsohet.

Me fuqinë që bart realiteti i shtuar, tablotë e fllashkëta i lënë kornizat pas e të bëjnë pjesë të vrullit të lëvizjes dhe ngjyrave.

Ekrani i vogël ndan më dysh dy botë, atë që shohin sytë dhe tjetrën që sytë e shohin përmes kamerës së telefonit.

Diçka magjike, të cilën pati dëshirën ta mirëpresë edhe vendi ynë. Për të parën herë.

Ideatori dhe organizatori i ekspozitës, Rei Ferguson Bengu, ka treguar për Albanian Post se kjo ishte ekspozita e parë në Shqipëri e ndërmjetësuar nga realiteti i shtuar.

Për të, ngjarja në vetvete është e rëndësishme dhe e veçantë pasi pjesëmarrësit patën mundësinë ta shijonin artin si kurrë më parë.

“Në ditët e sotme, Augmented Reality Art, konsiston në një teknologji inovative, si për artin, ashtu edhe për teknologjinë”, ka thënë Bengu.

Madje, për ta thjeshtuar idenë, ai ka pohuar se kjo tipologji e galerisë së artit, ndryshe “do të thotë të përjetosh artin në kuptimin e plotë të fjalës”.

Nga një workshop

Ndoshta mund të tingëllojë çuditshëm, por gjithçka e ka zanafillën në një workshop.

“Ideja për këtë ekspozitë nisi nga një workshop, i pari në Shqipëri për artistët e rinj”, ka rrëfyer organizatori.

E pas tij, erdhën edhe punimet artistike, të gjalla. Plot ngjyra dhe lëvizshmëri.

Bengu ka dalluar se ekspozita përfshiu “10 punime, secila prej tyre në Augmented Reality dhe për këtë artistet e përfshira kanë punuar me shumë dëshirë, me shumë vullnet dhe me shumë kreativitet”.

Ndryshe nga tablotë ‘e palëvizshme’, punimet e realitetit të shtuar kanë nevojë të shoqërohen edhe nga një aplikacion.

Kështu, për të përjetuar nga afër eksperiencën duhej shkarkimi në telefon i aplikacionit Artivive.

“Ky aplikacion është zhvilluar nga një kompani austriake, e cila bashkëpunon me muzetë më të mëdhenj të botës. Prandaj dhe përdoruesit e aplikacionit, si dhe vetë artistët, janë të shpërndarë kudo në botë”, ka ravijëzuar Bengu.

Bashkëpunim artistik

Artistet e reja, Hert’ha Pataj dhe Stefania Balla, së bashku me të, u trajnuan nga vetë shefi ekzekutiv dhe bashkëthemeluesi i aplikacionit, Sergiu Ardelean.

Ndërkaq, organizatori ka treguar se trajnimi u organizua nga kuratorja Lauresha Basha, gjithashtu themeluese e Galerisë 70, bashkërisht me ambasadën austriake.

Në përmbyllje të tij, të treve iu dorëzuan certifikata të pjesëmarrjes nga vetë Ambasadori i Austrisë, Christian Steiner.

Për dy artistet, i gjithë procesi ka qenë interesant.

“Punimet tona nuk janë si punimet e zakonshme që kemi parë shumicën e rasteve, por marrin jetë dhe bëhen më interaktive”, ka veçuar një nga artistet, Stefania Balla.

Kurse Hert’ha Pataj ka shpjeguar se realizimi i punimeve ishte njëfarë testi në të cilin u deshën javë për të arritur deri te finalizimi.

“Shumë kreative, interesante, një gjë e re…mezi po e prisnim diçka të re në lidhje me artin”, ka shtuar ajo.

E nesërmja?

Për sa i përket realitetit të shtuar të aplikuar në art, Bengu ka theksuar se ky inovacion po bashkon gjithnjë e më shumë artin me teknologjinë.

“Bota po sjell shumë inovacion, shumë gjëra ndryshe dhe Augmented Reality Art është një inovacion përveçse në anën teknologjike edhe në anën e artit”, ka vijuar ai.

Gjithashtu ka zbuluar se “presim që të vazhdojmë, të ndjellim këtë frymë të re në Shqipëri, të bëjmë edhe ekspozita të tjera, por kjo i mbetet kohës”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.