Kume: Votat e diasporës mund ta përcaktojnë fituesin e 25 prillit

“Këtë vit mund t’i kemi votat e para të emigrantëve në zgjedhjet e 25 prillit. Madje, ato do të jenë në nivel të komandojnë edhe mandate”. Kështu mendon ish-kreu i Komisionit Qendror të Zgjedhjeve (KQZ) dhe ekspert i reformave zgjedhore, Kristaq Kume.

Për Albanian Post, ai shprehet i bindur se ky vit do t’i mundësojë votat e para të shqiptarëve në diasporë. Sa i përket numrit të votuesve, ai thekson se tre muajt e ardhshëm do të jenë përcaktues për të parë sa emigrantë do të kenë mundësinë të zgjedhin përfaqësuesit e tyre në Kuvend.

“Jam i bindur se në krahasim me numrin potencial të votuesve jashtë territorit shqiptar, ata që do të votojnë do të jenë më të paktë”, mendon Kume. “Gjithsesi, kam ndjesinë se, ky numër do të mund të komandojë edhe mandate”.

Kume po ashtu vë theksin tek ajo që ai e quan problematikë mbi shpërndarjen e votave të diasporës, që përkthehet pastaj në problematikë gjatë përllogaritjes të votave.

“Është me rëndësi të kuptohet si do të përllogariten votat. Nëse përllogariten sipas vendbanimeve ku emigrantët janë të regjistruar në Shqipëri, atëherë vota e humb fuqinë”, shton ai.

“Nëse mblidhen vetëm në një qark ndërkohë, aty mund të kemi përcaktim të mandatit falë atyre votave. Ligji nuk përcakton asgjë mbi këtë pikë”.

Përsa i përket sfidave që paraqet sistemi, Kume thotë se “vota e diasporës ka qenë gjithnjë sfidë e vështirë për zgjedhjet në Shqipëri”. “Ligji lë të hapur çdo mundësi për votimin e tyre. Pavarësisht kësaj, ai nuk përcakton si duhet kryer procesi. Për këtë, vendos vetë KQZ-ja”.

A mund të kemi implementim teknologjie në këto zgjedhje?

Një pikë tjetër e rëndësishme është futja për herë të parë e teknologjisë në procesin zgjedhor. Meqë jemi vetëm tre muaj përpara zgjedhjeve, është me rëndësi të kuptohet nëse do të plotësohen kushtet për implementimin e saj.

“Për mendimin tim, koha nuk përbën problem”, shtjellon Kume. “Jemi në fazën e fundit të miratimit të kontratës nga KQZ-ja. Më pas, është kompania fituese që duhet ta bëjë të mundur aspektin logjistik. Kompetencat e KQZ-së përfundojnë aty”.

Ish-kryetari i KQZ-së bën edhe një ndarje të përdorimit që do të kenë asetet teknologjike në proces.

“Identifikimi biometrik do të kryhet në gjithë vendin. Plani është të ketë edhe votim e numërim elektronik në për 20% të votuesve. Ky do të jetë si plan pilot për të siguruar stabilitet në zgjedhje të ardhshme”.

Kume u shpreh i bindur se sot është e thjeshtë të kuptohet metodologjia nga shqiptarët. “Jemi të përditësuar me përdorimin e teknologjisë tashmë. Nuk besoj se do të jetë i vështirë adaptimi i këtij procesi nga votuesit”, tha ai.

Sipas tij, sfida më e madhe e Komisionerit Shtetëror të Zgjedhejve, Ilirjan Celibashi, mbetet një proces zgjedhor i pranuar nga palët. “Edhe nëse ka kontestime, puna e KQZ-së nuk duhet të jetë alibi për to. Jam i bindur se cilësitë administrative të komisionerit do të jenë rezultative për zgjedhjet në Shqipëri”, përfundoi Kume.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.