E gjithë Shqipëria pritet të gëlojë për nga fryma italiane këtë fillim qershori, pasi qytetet kryesore të vendit do të mikpresin “Javët Kulturore të Italisë”, me një mori aktivitetesh social-artistike, vëmendja e të cilave do të jetë pikërisht promovimi i kulturës italiane në Shqipëri.
Dy vende, të cilët e njohin njëri-tjetrin më shumë se mirë, por që kanë akoma më shumë për të zbuluar kulturalisht, artistikisht e tradicionalisht.
Një hapje zyrtare simbolike do të jetë ajo mbrëmjes së 31 majit, në Sheshin kryesor të Tiranës, atë Skënderbej, duke sjellë në “pasarelën” e improvizuar një sfilatë me veshje skenike të kohës, për t’i paraprirë shfaqjes “Ballo me Maska”.
Ora 00:00 e 1 qershorit do të shënjojë edhe ndezjen zyrtare të dritave artistike me tri ngjyrat e flamurit italian, të cilat do të çelin siparin e ngjarjeve.
Pjesa më e madhe e aktiviteteve do të jenë të vendosura në Tiranë.
Me vëmendje për nga arti, kultura, spektaklet, por edhe në elementë, si: kulinaria, sheshet kryesore të kryeqytetit do të presin ekspozita të ndryshme, workshope dhe ngjarje artistike.
Shkodra do të jetë një tjetër qendër e rëndësishme e ngjarjeve të Javës së Italisë, kryesisht të karakterizuara për nga shfaqjet kinematografike dhe ato teatrale.
Vende të tjera, të cilat do të preken gjatë fundjavës nga fryma italiane, do të jenë edhe Gjirokastra, Berati e Vlora, me një mori aktivitetesh të ndryshme.
Mbyllja do të jetë ndërkaq në skenën e madhe të Amfiteatrit të Liqenit, me performancën e këngëtarit të njohur italian, Albano Carrisi, i cili ka edhe një lidhje të veçantë shpirtërore me Shqipërinë dhe nuk ka ngurruar ta shfaqë këtë sa herë i jepet rasti.
Koncepti i Javëve Kulturore Ndërkombëtare ka të bëjë mbi të gjitha me shpërfaqen e kulturave të ndryshme botërore në Shqipëri, si shenjë e miqësisë mes vendeve dhe si një aks i ri sinergjik i krijuar për të gëluar jeta social-kulturore e vendit (pa ndërprerje).
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
